Footer

BANNER NEWS: Illegal koneksion ti waya iti tiendaan, naduktalan ti BFP-Vigan

VIGAN CITY – Adu dagiti kabarbaro nga illegal a koneksion ti koriente kadagiti stalls iti tiendaan ken boarding houses ditoy siudad, daytoy ti impalgak ti hepe ti Bureau of Fire Protection kalpasan ti insayangkatda nga inspeksion kadagiti nadumaduma a commercial establishments ditoy itay nabiit.

Kinuna ni Vigan City Fire Marshall Floro Obrero a naduktalanda pay bayat ti inspeksion nga insayangkatda iti Vigan Heritage Village a pagbarnisan ken pagpintaan uray kadagiti pagtagilakuan dagiti antigo a produkto ditoy a lugar.

“Adu dagiti makitatayo a kabarbaro nga illegal nga extension,” kinuna ni Obrero sana innayon a dagitoy ti papaikkatda kadagiti stall owners iti tiendaan.

Kadua ti BFP ti City Engineering Office a nagisayangkat iti inspeksion iti tiendaan publiko, kadagiti dormitorio ken boarding houses ken iti Heritage Village kas panagtungpal iti pammilin a naggapu iti Opisina ni Mayor Eva Marie S. Medina tapno masukimat no husto met la dagiti koneksion ken instolasion ti koriente kadagitoy a pagtagilakuan ken commercial establishments para iti pannakalapped iti rumsua nga uram.

Kinuna ni Obrero nga illegal dagitoy a baro nga instolasion agsipud ta adda dagiti specified nga instolasion dagiti waya iti tiendaan publiko.

Nadakamat ti BFP officer nga adda pay nakitada a maysa nga stall nga adda nakagangat a kandela iti altarna numona ta luplupot pay dagiti tagilakona.

Itay nabiit, nauram ti  Cristy’s Store a mapapati a nagtaud iti napanawan a nakagangat a kandela ken dimmapuan dagiti tagilako ti nasao a puesto.

Linagidaw pay ni Obrero ti pannakaikabit dagiti substandard nga instolasion a dagiti payen stall owners ti agikabit a posible a pagtaudan ti uram iti tiendaan publiko.

Kinuna ni Obrero nga isubmiteda iti mayora dagitoy a naduktalanda tapno maparitan dagiti stall owners nga aginstolar iti illegal a koneksion iti uneg ti puestodada tapno malapdan uram iti tiendaan publiko.

Kabayatanna, indagadag ni Obrero kadagiti store owners iti Heritage Villate a dagiti laeng finished products ti maidispley kadagiti pagtagilakuanda, saan ket nga iti Heritage Village ti paglihaan ken pagbarnisanda.

“Saan a mabalin daytoy,” kinuna ni Obrero idinto nga inyunay-unayna nga iti ruar wenno iti bodega ti rumbeng a pagbarnisan dagiti trabahador kadagiti tagilakoda.

“Maysa a pagpangpangastayo ti Heritage Village ket rumbeng a saluadantayo ken saantayo a baybay-an,” kinuna ni Obrero.

Nabingay ti inspeksion team iti tallo: maysa iti tiendaan publiko, sabali iti Heritage Village ken sabali kadagiti boarding houses iti Barangay Tamag.#

Comments are closed.