Footer

KOMENTARIO: Bales ti nakaparsuaan

Idi laeng napan a tawen, dinalapus ti nakapigpigsa a Bagyo Ondoy ken Pepeng ti pagilian a nakaigapuan ti pannakadadael dagiti milion ti pategna a pagtaengan, pasdek publiko, imprastruktura ken dadduma pay a sanikua ken nangidateng iti pannakalayus dagiti nadumaduma a lugar iti Metro Manila ken ti akin-Amianan a Luzon a pakairamanan ti Pangasinan, La Union, Ilocos Norte, Ilocos Sur, Cordillera Region, Cagayan Valley, Isabela, ken Baguio City. Gapu iti didigra a pinarnuay dagitoy, naideklara a calamity areas dagiti probinsia a naapektaran.

Gapu kadagitoy a bagyo, nagsagaba unay dagiti nadidigra nga umili ket nagbalin a dakkel a parikut dagiti agtuturaytayo ti taraon, pagindegan ken salun-atda

“Daytoyen ti kadaksan a bagyo a napuotak,” kinuna ti maysa a lumakay nga agindeg iti Pasig City a maysa kadagiti nalayus ti pagtaenganna idi dimmuprak ti bagyo Ondoy.

Idi timmapog ti Abril daytoy a tawen, nagsagaba manen ti Cagayan ken Isabela iti adu a pukaw iti produksion ti pagay ken nateng gapu iti isasangbay ti tikag. Nagbalin a dakkel a nakaburiboran dagiti agtuturay no kasano a masalbar dagiti mula dagiti mannalon bareng adda pay maagsawda nga apit.

Naiwayat dagiti cloud seeding ngem awan ti naparnuay a tudo gapu iti kaawan ti ulep. Kabayatanna, nagrengngat dagiti kataltalonan ket agsipud ta awan latta ti tudo, nagango dagiti kapagayan a nagtungpal iti nakirang unay nga apit ti bagas a kangrunaan a taraon dagiti Filipino.

Gapu iti kaawan ti tudo, nagdanag metten dagiti agtuturay iti Metro Manila gapu ta nababa unayen ti danum iti La Mesa Dam a pagtataudan iti pagpadanum dagiti mannalon ditoy a deppaarna kasta met iti inumen dagiti agindeg kadagiti siudad a supsuplayan daytoy a reservoir ti danum.

Tapno di rumaba ti parikut, indagadag payen ti gobierno ti panaginut dagiti agindeg iti siudad  iti aramatenda a danum.

Pagyamanan ta dimteng met la ti tudo ta uray kaskasano, adda met sangkabassit a naurnong a danum kadagiti dam. Ngem uray ita, kritikal pay la ti danum ket kasapulan ti agsasaruno a tudo tapno masulnitan dagiti pagkurangan a kasapulan dagiti umili iti siudad ken dagiti mannalon a gumawgawawa iti tudo para kadagiti kataltalonanda.

Apay a kastoy metten dagiti mapaspasamak? A no saan nga awan ti tudo a pakaigapuan iti nakaro unay a tikag,  agsasallupang dagiti bagyo ken sobsobra ti danum nga ibuyat dagiti tudo a mangidateng met iti nakaro a layus?

Kanaig daytoy, maysa nga autoridad a mangsipsiput iti aglawlaw ti agkuna a rumungrungsot dagiti bagyo a mangdidigra kadagiti pagilian iti nadumaduma a paset ti lubong. Kuna dagitoy a kangrunaan a gapu ti agtultuloy a panagbara ti lubong. Global warming. Bumarbara ti Ina a Daga!

(Maituloyto)

Comments are closed.