Footer

Ballaag ti polis iti publiko: agannad agisursorsor peke a solicitation letter

CANDON CITY -Imballaag ti polis ti panangberipika dagiti umili iti solicitation letter a maipabasa kadakuada tapno saanda a mabiktima kas iti napasaran dagiti sumagmamano a negosiante ditoy siudad itay nabiit.

Impakdaar daytoy ti kapolisan kalpasan ti pannakatiliwda ti dua kadagiti tallo a suspek a nangbiktima iti sumagmamano nga agnegnegosio ditoy siudad itay nabiit.

Inaresto dagiti intelligence operatives ditoy siudad iti agarup 1:45 iti malem ti Hunio 26, 2010 da Jovencio Valdez y Fernandez, 44, naasawaan, residente iti Arzadon, San Manuel, Pangasinan ken ni Jojo Quiton y Flores, 23, residente iti Bonuan Guesset, Dagupan City bayat ti panagsolisitda iti Jhen’s Eatery iti Barangay San Antonio, Candon City nga iggemda ti naparbo a surat manipud iti maysa a barangay kapitan ditoy siudad.

Nakalibas ti kaduada a nabigbig a ni Dennis Palaganas, residente iti Catbangen, San Fernando, La Union.

Iti inisial nga inbestigasion dagiti polis, napan nagsolisit dagiti suspek iti agarup 12:30 iti malem iti daytoy nga aldaw ken ni Melotecia Dizon y Viernes, 35, naasawaan, akinkukua ken manager iti Dan-Mel Marketing ken residente iti Paypayad, Candon City, ngem imbaga daytoy a sabali ti nagan ken pirma ti barangay kapitanda.

Segun ken ni Dizon, apagdengngeg dagiti suspek a kalugaranna ti barangay captain, dinagdagusda ti pimmanaw.

Ngem sumagmamano a negosiante ditoy siudad ti biniktima ti grupo.

Nagpulong iti polis ni Michelle Gambito y Moria, 23, balasang, residente iti Barangay Oaig Daya, Candon City a sinolisitan dagiti tallo a suspek iti flower shopna iti abay ti public market.

Intudo met ni Zayda Saguilayan y Emilio, 25, balasang, OIC ti Russ RTW shop da Quiton, Palaganas ken Valdez a nagsolisit iti pagtagilakuanna ken linibasda pay nga innala ti maysa a barikes nga aggatad P299.95.#

Comments are closed.