Footer

BANNER NEWS: Chinese investors, interesadoda nga agnegosio iti Ilocos Sur

VIGAN CITY – Maysa a dakkel a kompania iti People’s Republic of China ti interesado nga agibaut iti negosio ditoy Ilocos Sur.

Kinuna da President Li Shukuan ken Vice President Xu Yongjie ti MCC International Incorporated Limited, maysa kadagiti kadakkelan a kompania iti nasao a pagilian, a sisasaganada a makitinnulong iti pannakapasayaat ti lokal nga ekonomia ti Ilocos Sur, kagiddan ti panangipresentarda ti kangrunaan a focus ti kompania a pakairamanan ti engineering and construction; resource development; property development ken management development iti China.

Bimmisita ditoy dagiti sangaili nga Intsik babaen ti panangidaulo da Li Shukuan ken Xu Yongjie idi Hulio 1, umuna nga aldaw a panagtakem ni Gov. Luis “Chavit” Singson kas agsubli nga ama ti probinsia tapno kitaenda no ania ti negosio nga ibautda ditoy probinsia.

Iti investment forum a naangay iti kapitolio,  impresentar da Gov. Singson, Vice Governor Deogracias Victor Savellano ken Provincial Planning and Development Coordinator Enrie Mendoza II dagiti potential ti probinsia a mabalin a pagpuonan dagiti international private investors a kas ti MCC.

Kinuna ni Mendoza a maipangruna ti Agribusiness and Eco-Tourism Market Focused Strategy iti sibubukel a probinsia a biningayda iti uppat a quadrants: Quadrant I – “Metro Cabugao, Ilocos Sur Freeport Special Economic Zone” a buklen dagiti ili ti Sinait, Cabugao, San Juan, Magsingal, Sto. Domingo ken San Ildefonso; Quadrant II – “Metro Vigan World Heritage Area and Vigan IT Park” a buklen ti Vigan, Caoayan, Sta. Catalina, San Vicente, Bantay, Santa, Narvacan, Sta. Maria ken San Esteban; Quadrant III – “Metro Candon Agribusiness and Light Industrial Ecozone” a buklen ti Candon City, Sta. Lucia, Sta. Cruz ken Tagudin; ken Quadrant IV – “Upland Biodiversity Ecological Resort” a buklen ti Sugpon, Alilem, Suyo, Cervantes, Quirino, Sigay, Gregorio del Pilar, Salcedo, Banayoyo, Galimuyod, San Emilio, Lidlidda, Banayoyo, Burgos, Nagbukel, ken Santiago.

Kas pangawisna kadagiti negosiante nga Intsik, kinuna ni Singson a ti Ilocos Sur ti maysa kadagiti sangapulo a kabaknangan a probinsia iti Pilipinas ket napintas unay no makita dagiti investors dagiti sektor a mabalinda a pagpuonan iti probinsia.

Kinuna ni Singson a mangnamnama  nga agbalin a nabunga daytoy nga ibibisita ti MCC iti Ilocos Sur.

Kinuna ni Li Shukuan a kangrunaan ita a kitkitaen ti kompaniada ti posible a resources management dagiti mineral deposits ti Ilocos Sur kas iti balitok, copper, iron magnetite, sandstone, gravel ken limestone.#

Comments are closed.