Footer

Dagiti Labid iti Nagkurusan (Maikapat a paset)

“Bigbigatendakami ketdin a tsistsismisen, ‘ninayo a bakbaketan!” inradies ni kayong. Idi ilayatna manen ti imana, nagpuagit dagiti dua nga immadayo.

Malaksid iti kinalaingda nga agtsismis, adda pay sabali nga aramid dagiti dua. Malagipko daydi  Huebes a kaaddak iti bassit a farm da Anti Loding a kasinsin ni nanang iti daya. Nairana idi nga immayda ta dumawatda kano iti kalamansi a pagperresda iti jumping salad. Bayagna la a nagwen ni anti, kasladan naibulos a kalding a nagburas. Saglilima kiloda. Idi makitada dagiti nagaatiddog a bunga ti tarong iti sabali a paset ti farm, ay ket naginnunadan a nagpuros. Binay-an lattan ni anti ida ta saanna a kayat ti agbalin a topiko ti tsismis. Ngem iti mumalem daydi nga aldaw, kasta unay ti bassawang ni ikit ta nadamagna a saanda nga inyawid dagiti binurasda a kalamansi ken tarong no di ket intarusda nga inlako iti tiendaan ti San Domingo.

Adda pay daydi gundaway a linibasda nga innala tay radio kaset ni Lakay Tasio a kabsat ni Baket  Itang. Kasta unay ti tabbaaw ti lakay idi maduktalanna nga awan tay pagdengdengganna iti Laughingly yours, Bianong a paboritona a dengdenggen no kasta a malpas ti pangaldaw. Inlunlunod ti lakay nga agalmoranas koma diay nangala iti kasla bukel ti sarguelas ngem saanen a nagsubli daydi radio kaset. Idi agangay, nagdinamag laengen iti Cabsil a napan inlako dagiti dua a baket iti menos presio iti muslim nga adda puestona diay tiendaan. Impambarda kano nga adu ti radio kasetda isu nga ilakodan imbes a madadael a di maus-usar. Nagpuonanda kan iti 5-10-15 a tong-it daydi naglakuanda.

Alisto pay dagiti dua a babbaket a mapan makipunsion. Kuna man ni nanang nga immalada kadagiti ammada a nabirngasan iti arkos ti bodaan ditoy ilimi a San Angkuan. Kas met laeng kadagiti ammada, adda listaanda dagiti agpasken. Addada latta uray saanda a maimbitaran. Saanda pay a mapnek ta agiyawidda pay. Ibagada a kanen ti tarakenda nga aso ngem saanda met nga awaten no tulang ti ited ti agpasken.

Iti isasangpet da Ninong Danny ken Ninang Suzie a ninong ken ninangko iti buniag a nagbalikbayan manipud  Australia, nagpadayada kalpasan a pinabendisionanda ti baro a balayda. Adu ti sagana. Maysaak met idi kadagiti adda iti dayaan ta inkuyognak ni nanang.

Kas ninamnama adda manen dagiti dua a babbaket. Sangkadayawda ti napintas a balay dagiti nagbalikbayan. Sabali kano a talaga ti adu’t kuartana.

“Ngem ammom, atanud, no siak ti kas kada Danny, diak  kayat a kastoy ti klase ti padaya. Nasaysayaat met laeng ti simple,” inyarasaas ni Baket Insiang iti besprenna a mayat ti panagisubona iti chicken curry.

“Wen a, atanud. Ngem nasayaat met latta ta ne, mairanudta. La, mansuem dayta chicken curry, nananam sika,” inkabukab  ni Baket Itang.

“Pudno ta kunam he! he! he! La, yawatmo man ta malukong ti macaroni salad ta mangipapel datao,” inkidag ti nakuttong a baket a nalaing a makidaya ngem awan ti lumuklukmeganna. Ibagbaga pay ketdi ti dadduma nga adda apat-apatna isu a kullapit latta.

Pagam-ammuan ta naggiddan a timmakder dagiti dua a babbaket nga apputda dagiti tianda.  Iti ilalabasda iti sanguanak nga umin-inum iti pepsi, nangngegko ti panaggaradugod ti boksitda. Nagturongda iti kinawayanan iti ballasiw ti kalsada.

“Nagalastran sa metten ta tianyo, nana,” impakamakam ti maysa a sangaili a nakasiput kaniada.

“Minansoyo met ngamin ta chichen curry ket adda gatasna. Baka adda laktos intoleransyo,” impukkaw pay ti maysa.

“Binukodanda dayta sangamalukong a macaroni salad kunam a,” innayon ti kasangsangoda itay a natadem ti panagmatmatana a baket a di nakaraman iti salad ta intakdang met amin dagiti dua.

Saanen nga inkaskaso pay dagiti dua a babbaket dagiti kantiaw ta kaslada asuk a nagpukaw iti linged dagiti kawayan. Iti panunotko, kasla makitkitak ida a nagtinnallikud a nagmasngaad iti kasamekan. Naimbag laengen ta saan a panagrarabong amangan no matugkik pay ti kerretda no dida mapuntaan ti pagpuggiitanda!

(Maigibusto)

Comments are closed.