Footer

EDITORIAL: Iti panagtugaw ni Pres. Aquino, naipabaklay kenkuana nagkaadu a problema ti panagituray

Karagpin ti panagtugawna kas maika-15 a Presidente ti pagilian, naipabaklay ken ni Pres. Aquino dagiti nagkaadu a problema a napanawan ti administrasion Arroyo kas iti dimmakkel a depisit ti gobierno, dakkel a bilang dagiti awanan panggedan, nangina a magatgatang, nababa a sueldo, problema iti edukasion, salun-at ken dumakdakkel a populasion.

Sangpetan pay ni Pres. Aquino iti Malakaniang dagiti isyo ti Maguindanao massacre, ti agtultuloy a pannakapapatay dagiti kameng ti media ken dagiti kameng dagiti grupo nga aktibista wenno kumankannigid, panagkunniber ken korapsion kadagiti nadumaduma nga ahensia ti turay a mapapati a nakaisawsawan dagiti mangidaulo kadagitoy ken uray ti pamilia ti Presidente.

Ti napalabas a dua a panagpipili ti mangpatalged a nauman dagiti tattao iti panagraira ti panagkunniber, anomalia ken korapsion kadagiti nangato a koridor ti turay ket dayta a karirikna ti nangimaldit iti “agek ni patay” kadagiti kandidato ti kaul-ulog nga administrasion.

Iti baet ti panangibambando ni Arroyo ken dagiti pasurotna ti isasayaat ti ekonomia iti babaen ti administrasionna, dagiti adu a naipasdek nga inprastruktura, pannakaitandudo ti programa ti salun-at ken edukasion ken dadduma pay a mangitag-ay iti kalidad ti panagbiag dagiti umili, makuna ketdi a saan a narikna dagiti ordinario a tattao a nagtariktik kadakuada dagitoy maipaspasindayag a nagapuanan ti kaul-ulog nga administrasion.

Nangato ti ekspektasion dagiti umili ken ni Presidente Aquino a maikkan iti naan-anay a panangsolbar kadagitoy a nadadagsen a problema ti pagilian. Nasirayan dayta iti nabara a panangsarabo ken panangabrasada kenkuana iti sadinoman a napananna idi katibok ti kampania. Napatalgedan dayta iti aglaplapusanan a panangbutosda kenkuana a mangidaulo kadakuada iti innem a tawen.

Dakkel ti pammati dagiti umili a tungpalen ni Pres. Aquino ti karina a mangtukkol iti korapsion bayat ti panagtakemna a kas mangidaulo iti pagilian. Kastoy ti kadakkel ti namnamada idi agtugaw daydi inana a Cory kalpasan ti rebolusion iti Edsa ngem anian ta nagkamtud ti pannakatungpal dayta nga arapaap. Mangnamnama dagiti umili a saan nga agtungpal manen iti sabali pay a pannakapaay ti pammatida a pannakatungpal dagiti nausat a kari, kas iti napasamak iti panagtakem ni Pres. Cory.

Ngem saan a kabaelan ni Pres. Aquino nga ibaklay nga agmaymaysa ti pannakapugipog dagiti korapsion ken pannakadalus dagiti nadumaduma a sanga ti gobierno. Kasapulanna ti tulongtayo nga umili. No adda pannakitinnulong dagiti amin a maseknan a sektor, napigpigsa ti liderato a mangipakat kadagiti addang tapno masolbar dagitoy kangrunaan a problema a mangidagdagel iti pagiliantayo. Adda pagsasaotayo: Adda naisangsangayan a pigsa iti panagtitipkel; iti panagsisina, agtungpal iti pannakatinnag.

Kuna ni Pres. Arroyo…”kaduaendak…iti nalinteg a dalan.”

Kaduaentayo, bayabayentayo, akayentayo ngarud ni Pres. Aquino iti nalinteg a dalan ta kas impatalgedna, babaen ti “nasayaat a panangituray, pumintas ti panagbiag”.#

Comments are closed.