Footer

Mannalon, napapatay

STA. MARIA, Ilocos Sur – Maysa a mannalon ti napapatay iti agsapa ti Hunio 28 iti Sitio Tuday, Barangay Baballasioan, ditoy nga ili.

Saan pay a nabigbig ti nangpatay ken ni Regino Dasalla, Jr. y Trinidad, 31, naasawaan, mannalon, residente iti nadakamat a lugar.

Segun iti polis, napan kinita ti biktima ti impastorna a nuangna iti agarup 5:30 ti bigat iti nasao a petsa ket iti agarup 5:45, nakangeg ti asawana a ni Edna iti kanalbuong isu a napanna sinurot ni lakayna.

Nakita laengen ni Edna ti asawana nga awanen ti biagna iti talon, nagsagrap iti sugat iti tengngedna.

Nakarekobre dagiti polis iti dua a kapsula a mapapati a nagtaud iti Cal. 5.56 iti nakapasamakan ti krimen.

Iti pannakaisurat daytoy, di pay ammo ti motibo ti krimen.#

Comments are closed.