Footer

100,000 seedlings naimula iti Fiesta ti Bantay

CANDON CITY – Nasurok a 100,000 a nadumaduma ti klasena a seedlings ti kayo ti naimula iti watershed ditoy siudad iti pannakarambak ti  Fiesta ti Bantay idi Hulio 6.

Indauluan ni  City Mayor Allen Singson ti tree planting iti nasurok sangagasut nga ektaria a watershed area a masarakan iti kabambantayan a sakupen ti barangay San Andres ken Palacapac, ditoy siudad ken nakipartisiparan dagiti estudiante manipud kadagiti nadumaduma a pagadalan, national agencies, non-government organizations, pribado a sektor, empleado ti gobierno, soldado ken dadduma pay.

Presente iti daytoy nga aktibidad da Bokal Robert Tudayan, dagiti city officials a pakairamanan da Konsehal Osias Diasen, chairman ti committee on environment and natural resources, ken ni kabarbaro a konsehal ditoy a ni SPM Florendo Mangasar, Jr.

Ni Bokal Robert Tudayan ti mangilunglungalong iti panagmula ken panangsaluad iti kabambantayan ta kas kuna ti konsehal, daytoy ti maipatawid iti sumarsaruno a kaputotan.

Kas paset ti parambak, napirmaan ti memorandum of agreemen iti nagbaetan ti Siudad ti Candon ken ti Tanim Kalikasan nga idauluan ni Executive Director Asis Perez.

Agdagup iti 100,000 a seedlings ti nadumaduma a kayo ti inted ti Tanim Kalikasan a naimula iti daytoy nga aldaw, segun ken ni Perez.

Nangrugi a namulmulaan ti watershed area idi 2006 nupay nairugin  a maramrambakan ti Fiesta ti Bantay ti siudad tapno mamulaan iti kaykayo ti aglawlaw.

Rinibun a seedlings ti mahogany, gmelina, narra, akasia agraman dagiti nagkaadu a fruit bearing trees ti naimulan iti watershed.

Dagiti agindeg iti Barangay Palacapac ken San Andres ti natudingan a mangmantener iti nasao a lugar babaen ti panangsibogda kadagiti naimula.

Kinuna ni Singson a maysa a prioridad a programana  ti pannakamula ti watershed tapno agbalin nga eco-tourism project ti amianan.#