Footer

2 kameng ti Salisi Gang, natiliw

SAN JUAN, Ilocos Sur – Dua a babai a mapapati a kameng ti Salisi Gang ti natnag iti ima dagiti polis iti inwayatda dagitoy a hot pursuit operation mainaig iti panagtakaw dagiti suspek iti maysa a pagtagilakuan ditoy nga ili idi nabiit.

Nadetene da Marlyn de Vera y Garcia, 40, balasang, ken Carmelita Sampaga y de Vera, naasawaan, agpada a residente ti Barangay Tocuk, Bayambang, Pangasinan gapu iti mapapati a panangtakawda iti kuarta ken selpon ni Nancy Villahermosa y Peneyra, 36, negosiante, residente iti Barangay Bannuar ditoy nga ili idi Hulio 5, 2010.

Iti inbestigasion dagiti polis, simrek da de Vera ken Sampaga iti RNJ Store a kukua ni Villahermosa ket nagpammarangda a kustomer.

Kabayatan ti panangasikaso ni Villahermosa kadagiti sabali a kustomer, intaray dagiti suspek ti bagna a naglaon iti P120,000, maysa a Nokia a selpon nga addaan kamera nga agpateg iti 20,000 ken 3 a Motorola a selpon nga agpateg iti P25,000.

Nangiwayat dagiti polis iti pursuit operation a nagtungpal iti pannakatiliw dagiti suspek.

Kabayatanna, napilaanen iti kaso ti tallo a lallaki a mapapati a kameng ti Salisi Gang a nangloko iti sumagmamano a negosiante iti city prosecutor’s office ditoy.

Napilaan iti kaso a panagtakaw ken panagpalsipika iti public documents da Jovencio Valdez, 44, residente iti Barangay Arzadon, San Manuel, Pangasinan; Jojo Quiton, 23, residente iti Bonuan Guesset, Dagupan City ken ni Dennis Palaganas, residente iti Catbangen, San Fernando City, La Union.

Madama a birbiroken dagiti polis ni Palaganas.

Naaresto dagiti suspek gapu iti panagsolisitda iti kuarta babaen ti peke a solicitation letter.

Naduktalan ti modus operandi dagiti suspek idi imparupa kadakuada ti maysa a negosiante a nagsolisitanda a sabali ti nagan ti barangay captainda iti Paypayad a nailanad iti letter head ti solicitation letter.

Sumagmamano kadagiti biktima ti nangitudo kadagiti suspek a linibas dagitoy ti sumagmamano a tagilakoda bayat ti panagsolisitda iti pagtagilakuanda.#

Comments are closed.