Footer

25 a pamilia, immawat iti titulo ti daga

GALIMUYOD, Ilocos Sur- Duapulo ket lima a pamilia a residente iti barangay ti Candon City ken ditoy nga ili ti immawat iti titulo ti daga manipud ken ni outgoing Cong. Eric Singson itay nabiit.

Naiyawat dagiti nasao a titulo ti daga kadagiti 25 a pamilia nga agindeg iti Barangay Mckinley, Galimuyod, Ilocos Sur ken Bugnay, Candon City, Ilocos Sur idi Hunio 28 a naigiddan iti oathtaking ken induction ceremonies dagiti nabutosan nga opisial ti ili iti panangidaulo ni Mayor Jessie Balingsat.

Timmabuno iti nasao a programa dagiti opisial ti provincial agrarian reform office nga indauluan ni Engr. Vic Gines, agdama a chief agrarian reform officer, ken dagiti municipal agrarian reform officers ti Candon City ken Galimuyod.

Impeksa ni Lorenzo Nanag, maysa kadagiti kalakayan a residente nga immawat iti titulo ti daga, iti dakkel a panagyamanna iti tulong ni dati a Congressman Eric Singson iti pannakatitulo dagiti dagada nupay agraduaren a diputado iti maikadua a distrito ti Ilocos Sur.

Segun ken ni Nanag, naammuanda nga ilaklako ti akinkukua iti daga a nagsaadan ti balay ken taltalonenda ket nagpatulongda ken ni Singson.

Ginatang ni Singson ti daga sana pinatituluan daytoy iti nagan dagiti mannalon.#