Footer

Kabarbaro a PNP regional director, pormal a nagtugaw

SAN FERNANDO CITY – Pormal a nagtugaw ni Police Chief Supt. Orlando M. Mabutas kas director ti police regional office ditoy iti simple a turn-over ceremony a naangay iti PRO1 grandstand idi Hulio 2.

Sinuktan ni Mabutas ni Police Chief Supt. Manuel H. Cachero a nagpaay a kas acting regional director ti PRO1 kalpasan a nagretiro iti serbisio idi Hunio 22 ni dati a regional director Police Chief Supt. Constante D. Azares, Jr.

Agtalinaed ni Cachero a kas deputy regional director for administration iti PRO1.

Iti panagbitlana kalpasan ti seremonia babaen ti panag-officiate ni Police Deputy Director General Edgardo E. Acuña, deputy PNP chief for operations ken kangrunaan a bisita, impeksa ni Mabutas ti panagyamanna  ken ni Pres. Benigno “Noynoy” Aquino III ken ni Police Director General Jesus Ame Verzosa, hepe ti PNP, gapu iti panagtalekda kenkuana a sumublat iti puesto ti regional director iti PRO1.

Inkari ni Mabutas ti agresibo a pannakitinnulongna iti komunidad tapno magun-od ti reporma idinto nga innayonna ti “panangituloyna ti mission a mangipaay iti naseguridad nga aglawlaw para kadagiti tattao… a mangipatalged iti nawaya a panaggunay.”

“We will continue working closely with government officials, other government authorities, non-government organizations and with the people to establish an environment in which the rule of law is firmly established, where crimes and corruption can not succeed, where people feel safe to live a normal life, and where the economy can grow and flourish,” kinuna ni Mabutas.

Indagadag pay ni Mabutas kadagiti tattaona ti panangitedda iti suporta  kenkuana tapno magun-odda dagiti panggep ti PRO1 sana inyunay-unay nga ituloyna dagiti inrugi ti sinuktanna, idinto nga inggarantiana ti lideratona, dedikasion ken commitmentna…”

Kinuna pay ti baro a regional director nga awan ti lugar para kadagiti personnel a mangabuso iti autoridadda iti panangibaklayda iti pagannonganda.

Miembro ni Mabutas iti Philippine Military Class 1978. Nagpaay a director ti PNP Highway Patrol Group sakbay ti pannakadesignarna a regional director ditoy.#

Comments are closed.