Footer

Napaspas a panaggaraw ti ekonomia kadagiti away ti kangrunaan-CHAVIT

VIGAN CITY – Impatalged ni Gov. Luis “Chavit” Singson bayat ti turn over ceremony a naangay iti provincial capitol idi Hulio 9 nga ad-adda nga ikkanna iti importansia ti agtultuloy a panagdur-as ti probinsia babaen ti napaspas a panagtaray ti ekonomia kadagiti away tapno maital-o ti panagbiag ti amin nga umili.

Inyawat ni outgoing Governor Deogracias Victor “DV” Savellano iti daytoy nga aldaw ti simboliko a tulbek ti probinsia kas tanda ti panagsukaten ti rienda ti turay.

“Iti pannakakitak iti economic profile ti probinsia, ditoy met a makitak dagiti kasapulan tapno maragpat dagiti arapaaptayo para iti Ilocos Sur,” kinuna ti gobernador.

Karaman pay kadagiti tutokan ni Singson ti pannakarebisar dagiti government positions tapno makita dagiti overlapping items kasta metten ti pannakabukel ti maysa a purchase team para masigurado a nadalus dagiti transaksion ti gobierno tapno maksayan ti kaso ti panagabuso ken makainut pay ti probinsia.

Kadua ni Savellano dagiti dadaulo dagiti amin nga opisina a nangiyawat iti Prosperity Report (2007-2010) iti agsublin a gobernador ti probinsia.

Inyawat met ni outgoing Vice Governor Jerry Singson ti gavel ken mace ken ni Savellano kas tanda ti panangidaulon ti naud-udi iti legislative body ti probinsia.

Sinaggaysa ni Singson nga imbaga dagiti naaramidan ti Sangguniang Panlalawigan a pakairamanan ti naipasa nga 82 resolutions, 6 appropriation ordinances ken 4 provincial ordinances idi 2007; 130 resolutions, 10 appropriation ordinances ken 4 provincial ordinances idi 2008; 124 resolutions, 9 appropriation ordinances ken 5 provincial ordinances idi 2009 ken 52 resolutions, 3 appropriation ordinances ken 2  provincial ordinances manipud Enero 2010 agingga iti panagpatingga ti session idi Hunio.

Pinagyamanan ni Savellano dagiti nakatrabahona iti talek nga impaayda kenkuana bayat ti tallo a tawen a panagtakemna kas ama ti probinsia idinto nga inkarina nga itultuloyna ti napintas a pannakikammayetna iti liderato ni Gov. Chavit tapno agtultuloy ti itatayok ti Ilocos Sur.

Kabayatanna, kinauman ni Gov. Chavit dagiti kameng ti PNP Ilocos Sur iti panangidaulo ni provincial director P/SSupt. Eduardo Dopale ken dagiti chief of police dagiti nadumaduma nga ili ti probinsia ket inammona dagiti parikut ti police station a masakupanda.

Immandar pay ti gobernador a kitaen dagiti COP dagiti polis a tirong tapno mabaliwan ti ugalida.

“Diak kayat ti kotong ken ti frame up nga ub-ubraen ti sumagmamano a polis. Kitaenyo ti ugali dagiti taoyo. Maysa pay, masapul a tutokanyo dagiti kaso tapno masolbar daras ti krimen agsipud ta saan a napintas daytoy para iti imahe ti probinsia,” kinuna ti gobernador.#

Comments are closed.