Footer

Suspek iti pannakapapatay ti provincial fire marshall, nakasuan iti murder

VIGAN CITY – Kaso a murder ti impila ti polis ditoy maikontra iti suspek ti pannakapapatay ti provincial fire marshall  iti uneg ti opisinana idi Hulio 6.

Naipila ti kaso a murder iti prosecutor’s office maikontra ken ni Deputy Fire Marshall, Fire Senior Inspector Rey Monico Acena y Fuerte, residente iti Barangay Zone 5, Bantay, Ilocos Sur, ti kangrunaan a suspek iti pannakapapatay ni Provincial Fire Marshall Ruben Urmeneta Pascua, 54, residente iti Dela Cuesta Subdivision, Caloocan City idi agarup alas 9 ti rabii ti Hulio 6 iti uneg ti opisinana iti Jose Singson Street, Vigan City.

Work-related ti anggulo a kitkitaen dagiti inbestigador ditoy siudad a nakagapu iti pannakapapatay ti provincial fire marshall.

Kinuna ni Vigan City chief of police Supt. Elpidio Nartates nga adda pakainaigan iti trabaho ti motibo ti pammapatay kas maibatay iti inisial nga inbestigasionda.

Kinuna ni Nartates a mapapati a maipapan iti pondo ti kueskuestionaran ti suspek kas iti alokasion ti gasolina iti Bantay ken San Ildefonso fire stations nga adda iti babaen ti suspek ken iti mapapati a masansan a kaawan ti biktima iti opisinana.

Kinuna ni Nartates nga iti agarup alas 9:00 ti rabii ti Hulio 6, napan ni Acena iti fire station ket nadatnganna a mangmangan ti biktima ken dadduma a personnel.

Kalpasan ti pannangan ti biktima, inawisna ni Acena nga agpatangda iti uneg ti opisina.

Segun kadagiti saksi, nakangegda laengen iti dua a putok a naggapu iti opisina ti biktima.

Madamdama, nakitada ti suspek nga agdardaras a rimmuar iti opisina ti biktima, sinakayanna ti motorsiklona sa nagpataray nga immadayo.

Nagsagrap ni Pascua iti sugat iti ulo ken barukongna ket naideklara nga awanen ti biagna idi maidanon iti Lahoz Clinic and Hospital.

Boluntario met laeng a simmuko ti suspek kadagiti polis Bantay idi agarup alas tres ti malem ti Hulio 7 iti Barangay Bio, Tagudin, Ilocos Sur.

Nagkedked ti suspek nga agpalawag mainaig iti pammaltog.

Nakadetene ni Acena iti police station ditoy siudad.

Nakarekobre dagiti inbestigador iti paltog nga addaan iti magasin a nagkarga iti 7 a bala iti nakapasamakan ti pammaltog.

Kinuna ni Nartates a nasarakanda ti paltog iti makannawan a paset ti tengnged ti biktima, ket naipanen iti crime laboratory iti San Fernando City para iti pannakaamirisna no daytoy ti igam a naaramat iti pammaltog.

Naiwayatan metten iti paraffin test ti biktima no nagpaputok daytoy, segun ken ni Nartates. #