Footer

2 kameng ti hold-up gang, naipiskot iti manhunt operation

SAN ESTEBAN, Ilocos Sur – Dua kadagiti uppat a suspek ti natiliw iti manhunt operation nga insayangkat ti kapolisan ditoy kalpasan ti pananghold-apda iti maysa a bus iti national highway a sakup ti Sitio Bigbiga, Barangay San Nicolas ditoy nga ili idi rabii ti Hulio 9, 2010 .

Innaganan dagiti polis dagiti natiliw a suspek a da Melchor Beleno, 27, naasawaan, residente iti Barangay Gayaman, Luba, Abra ken ni Federico Tadeja, Jr., 38, residente iti Monquia, Dupax del Norte, Nueva Vizcaya.

Segun iti inisial nga inbestigasion dagiti polis, iti Santa Lucia a naglugan dagiti tallo a suspek iti Florida Bus a minaneho ni Jim Gatu y Menor, 48, naasawaan ken residente iti Barangay Poblacion II, Currimao, Ilocos Norte, ket imbagada iti konduktor a ni Allan Basilio y Navarette, 26, baro, residente iti Barangay 6, Laoag City, nga iti San Esteban ti pagdissaaganda.

Pinasardeng dagiti suspek ti bus iti asideg ti Flying V gas station a masarakan iti Sitio Bigbiga, Barangay San Nicolas sada inasut dagiti paltogda ken indeklarada ti hold-ap.

Kinasakas dagiti suspek ti P15,000 a koleksion ni  Basilio ken ti selponna a Nokia ken ti di pay ammo a kantidad manipud iti di nainaganan a pasahero a nakatugaw iti likud ti drayber.

Dimsaag dagiti suspek sada naglugan iti agur-uray a motorsiklo a minaneho ni Beleno ket naglibasda iti abagatan a direksion.

Nagresponde dagiti polis ditoy nga ili kalpasan a nagpulong kadakuada ti drayber ti bus ket nakamatanda dagiti suspek iti barangay road a sakup ti Santiago, Ilocos Sur.

Idi makita dagiti suspek dagiti polis, nagtatarayda iti nagduduma a direksion ket nabati ti drayber ti motorsiklo a dagus a tiniliw dagiti polis.

Naglemmeng ni Tadeja iti kabakiran ti Ambucao, Santiago ngem simmuko kadagiti barangay officials gapu iti nakaro a bisinna ken ut-ot ti sakana a natudok iti kandaroma.

Madama ti pannakaanup dagiti dua pay a suspek nga innaganan ni Beleno a ni Jiller Gayao, residente iti Barangay Agumanay, Luba, Abra ken maysa a Peter a residente iti Barangay Tukipa, Luba, Abra.#

Comments are closed.