Footer

BANNER NEWS: Agabuso a polis, mapakatan iti pannusa: PNP provincial director

BANTAY, Ilocos Sur – Binallaagan ti PNP provincial director dagiti polis iti babaenna a dida abusuen ti pagannonganda agsipud ta di agpangadua a mangipakat iti pannusa kadagiti naglabsing.

Karaman daytoy iti pammilin ni PNP provincial director Police Senior Supt. Eduardo Dopale, Jr. kadagiti hepe ti polis kas panagtungpal iti dawat ni Gov. Luis “Chavit” Singson a panangiwayat ti kapolisan dagiti addang tapno malapdan ti pannakaisayangkat dagiti krimen iti probinsia.

Binilin ni Dopale dagiti hepe ti polis nga ipakatda ti police visibility ken panagpatrolia kadagiti lugar a mapaliiw a pagrarairaan ti krimen tapno adda paggudengan dagiti managdakdakes a mangibanag iti dakes a panggepda.

Imbilin pay ni Dopale ti panangguyugoy ti kapolisan kadagiti barangay officials, tanod, NGOs,  ken dagiti kameng ti media tapno tumulongda iti pannakalapped iti krimen.

Sakbayna, pinaawagan ni Gov. Luis “Chavit” Singson ti liderato ti kapolisan iti probinsia gapu kadagiti pammaltog a naisayangkat iti probinsia.

Bayat ti miting, pinalagipan ni Singson ti kapolisan a maysa a sakripisio ti panagserbida idinto a dinawatna ti panangisublida ti respeto ken panagtalek dagiti umili kadagiti nakauniporme a polis.

“Kayatko a maisubli ti panagtalek dagiti tattao a no makitada ti polis, mariknada a masalaknibanda ken saanda a mabutbuteng,” kinuna ni Singson.

Dinawat ti gobernador ti panangiwayat dagiti polis iti naing-inget a panagrikisa nangruna kadagiti mapagsuspetsaan a tattao tapno malapdan ti krimen.

Indagadag pay ni Singson iti provincial director ken hepe ti polis ti agtultuloy a pannakidialogoda kadagiti polis iti babaenda tapno saan a mapanuynoyan dagiti dakes a polis a mangted iti madi nga imahe iti probinsia.

Sagudayen pay ti pammilin ti  provincial director ti panangireport wenno panangted dagiti agnaed iti impormasion iti polis kadagiti mapaliiwda a makaapektar iti urnos ken talna iti lugarda.

Naipalaon pay iti pammilin ti pannakasukimat ti listaan dagiti kaso ti pammapatay nangruna dagiti nakainbolbaran dagiti tattao a nagkalubbon iti motorsiklo ken listaan dagiti mapagduaduaan a tattao a maisar-ong iti hurisdiksionda.#