Footer

Dios ti agbati, Luzviminda (Umuna a paset)

NAGSARIMADENG ni Abel iti sakaanan ti andamio. Immanges iti nauneg ket tinangadna ti eroplano. Iti tangkarang ti nakuyem a bigat, kasla higante nga agila ti sasakayan a sisasagana a mangseppeg kenkuana.

Immaplaw ti pul-oy-bigat iti rupana. Nasapa pay ngem nabaran ti lawag nga agtaud iti katangtangkayag nga init. Kas nabasbasana kadagiti pagiwarnak ken magasin, bumarbaran ti lubong gapu iti adu unayen a konsentrasion dagiti greenhouse gases iti tangatang. Ngem iti panirigan ni Abel, bumarbara ti lubong gapu iti panagabuso ti tao iti nakaparsuaan. Kenkuana, dagiti layus, tikag, bagyo ken dadduma pay a kalamidad ket pammales ti nakaparsuaan iti panagabuso ti tao.

Tinangadna manen dagiti nagdadakkel a letra a naimarka iti sikigan ti eroplano: Bigaa Air Lines. Biahe Bigaa-Manila. Nangrugi ti biahe ti BAL idi kanikatlo a tawen. Adu dagiti pasahero nga agrubbuat ken sumangpet iti siudad agsipud ta nagbalinen ti Bigaa City a nalatak a pagbakasionan ken pagpallailangan. Nalataken ti siudad a tourist destination gapu kadagiti daan a pagtaengan ditoy a naipatakder pay idi tiempo dagiti Kastila.

Daytoy ti gapuna a napili da Abel ti BAL a pangirubbuatan iti mensaheda, mensahe a sigurado a mangegan ti sibubukel a pagilian ken uray iti ballasiw-taaw. Ita a bigat, maisayangkat ti maysa a hijack a sigurado a denggen dagiti amin a tao a managayat iti kappia!

Nataldiapan ti suli ti matana ni Andro, ti teknisian a kameng ti gungloda a “Triangulo” iti boksit ti eroplano.  Ni Andro ti para sukimat iti makina ti eroplano sakbay nga agluas.

Nupay di kumitkita ni Andro kenkuana, nasiputanna ti panangingato ni Andro iti tanganna. Senias dayta iti nagbaetanda a natungpalen daytoy ti naipakumit a pagrebbenganna – ti pannakaipuslit ti paltog ken granada iti lavatory ti eroplano.

Apagapaman a nagtung-ed ni Abel  kas sungbatna. Awan ngaruden ti problema mainaig iti armasda a mangtengngel iti eroplano.

Kasla dimmagsen ti bitbitna nga attache case idi umuli iti andamio. Aleng-aleng ti sungbatna iti kablaaw ti nalapsat nga stewardess. Nagmattider iti ruangan ket inwarasna ti panagkitana. Aganay a limapulo dagiti pasahero.

Dina naaluadan ti yaalsem ti rupana idi mailasinna ni Fernando de la Cuesta, ti agdama a mayor ti Bantaoay, a makipatpatang ken ni Padre Bernhart, ti obispo ti Buguias. Sigud a nadagsen ti rikna ni Abel ken ni Mayor de la Cuesta sipud idi rinames ti anakna ken dua a badigard daytoy ti inana a ni Luzviminda., liman a  tawen ti napalabas. Naabsuelto dagitoy iti kasoda gapu iti pannakapapatay dagiti dua a testigo iti pannakaitalaw ti inana.

Aggawid idin ti inana iti maysa a parbangon a panaggapuna iti Manila a simmarungkar kenkuana. Agtawen idi ni Abel iti disisais, adda iti umuna a tukad ti kolehio.

Iti nagsulian ti kalsada Jose Rizal ken Quezon Avenue a medio panipngeten, kellaat a nagsardeng ti maysa a kotse iti abay ti magmagna nga inana. Dimsaag ti dua a lalaki,  ginammatanda ti inana sada inalud-od nga inserrek iti kotse. Bimmanesbes ti kotse nga immadayo.

Maysa nga aglaklako iti balut ti nakasaksi iti napasamak. Imbaga daytoy a nalasinna ti anak ti mayor a nagmaneho iti kotse ken natandaananna ti  maudi a tallo a numero ti plaka ti kotse.

Sabali pay a saksi, maysa a mannalon nga agbambantay iti pugonna ti nakakita iti maysa a puraw a kotse a simrek iti lipit a nagturong iti maysa a bahay-kubo iti tengnga ti kataltalonan. Tallo a tattao ti pattapattana a rimmuar iti kotse a nangulod iti agik-ikkis a babai sada inserrek iti bahay-kubo.

Nadagsen dagiti testimonia dagiti testigo. Ngem anian ta sakbay ti pannakausig ti kaso maikontra iti anak ti mayor, nagpukaw ti aglaklako iti balut ket nakita laengen ti bangkayna a natatek iti bala iti asideg ti rangtay a mapan iti Nagsangalan.

Imbabawi ti mannalon ti testimoniana. Kalpasanna, nagpukawen a kasla asuk. Ammo lattan ni Abel a nabutbuteng daytoy.

Immanges iti nauneg ni Abel. Manen, dimmagsen ti barukongna, kas iti idadagsenna idi naammuanna ti napasamak iti inana.

Nagtung-ed ni Abel idi agsabat ti matada ken ni Elias. Nakatugaw ni Elias iti maikatlo a row iti sango. Ni Elias ti kaduana a manghaydiak iti eroplano. Para kenkuana ti granada a naipuslit iti eroplano.

Impusotna ti bagina iti balay ti nalukmeg a negosiante. Pinalabsanna a binasa ti paulo ti damag a basbasaen ti kaabayna: 5 ti natay iti demonstrasion! Nagkitem ti sangina. Dandani inaldaw a dayta ti yik-ikkis dagiti pagiwarnak. Kaanonto ti idadateng ti panagbalbaliw? nakunana iti nakemna.

Sinaklot ni Abel ti maletin. Imbakalna ti panagkitana iti labes ti sarming a tawa. Aggaarimutong dagiti ulep iti labes dagiti pasdek a kasla naimurumor iti bakras ti bantay. Pakauna ti dawel?

“Please fasten your seatbelt,” nagtimek ti stewardess. “Agrubuaten ti sasakayan.”

Imbarikes ni Abel ti sinturon iti barukongna. Nagwanerwer ti eroplano. Inunorna ti runway. Linabasanna ti control tower.

Narikna ni Abel ti apagapaman a pannakaital-ona iti panagampayag ti lugan nga agpangato.

Nagkidem ni Abel ta umirteng manen ti riknana. Immapay iti panunotna ni Luzviminda.  Ilunod ngata ti inana daytoy nga aramidenda?

(Adda tuloyna)

Comments are closed.