Footer

EDITORIAL: Maikkatan ti pork barrel dagiti agilinlinteg, no way!

Naipadamag itay nabiit a pampanunoten ni Presidente Benigno Aquino III nga ikabassitna ti Countrywide Development Fund (CDF) wenno Priority Development Assistance Fund (PDAF) wenno pork barrel a mait-ited kadagiti diputado ken senador tapno mapabassit ti dimmakkel a depisit ti budget ti gobierno. Simmuyopen ti depisit ti budget iti P340 bilion iti baet ti panangibambando idi ti administrasion Arroyo a simmayaat ti ekonomia ti pagilian iti babaen ti panangiturayna.

Iti biang ti kabarbaro nga administrasion, nasaysayaat a maikkatan ti pork barrel dagiti agilinlinteg ngem ti mangipakat iti baro a buis kadagiti umili. Adda idi tiempo iti administrasion Arroyo nga inikkatanna ti pork barrel idi simmuyop ti depisit ti budget gapu iti pinansial a krisis a nangdalapus iti pagilian.

Mairuruangan pay laeng daytoy a kapanunotan ti baro nga administrasion tapno mapabassit ti depisit ti budget, agarianggan dagiti sumagmamano a diputado agsipud ta saanda la ketdi a kayat a makissayan ti PDAF nga aw-awatenda. Iti agdama, umaw-awat dagiti diputado iti P70 milion idinto a P200 milion kadagiti senador a pork barrel iti tinawen.

Pagarigan laengen ni Diputado ti Quezon Danilo Suarez, kenkuana, saan a nasayaat a kapanunotan a maipababa ti alokasion ti pork barrel agsipud ta ad-adda a mapadagsenan (kano) ti biag dagiti tattao gapu ta basbassit ti pondo a maipaay a proyekto wenno trabaho kadakuada.

No patien met ni Diputado ti Albay Edcel Lagman, kontraproduktibo, kontra-marigrigat ken naginad ti panagdur-as no maikkatan ti PDAF.

Segun ken ni Lagman, bassit laeng ti P10 bilion a mapataud a savings ti gobierno manipud iti pork barrel  maikumpara iti dakkel nga epektona kadagiti serbisio a maipaay kadagiti umili nangruna kadagiti marigrigat, kas iti programa ti scholarship, tulong iti medikal, dagiti kasapulan unay a proyekto ti inprastruktura, livelihood, ken dadduma pay a pangidur-as iti panagbiag dagiti tattao.

Ngem iti maysa a report manipud iti Philippine Center for Investigative Journalism (PCIJ), maar-aramat laeng ti pork barrel  kas behikulo tapno magun-od ti butos dagiti tattao ken kas pagtaudan iti patronahe iti politika.

Nakitatayo no kasano nga inaramat ti napalabas nga administrasion ti pork barrel tapno magun-odna dagiti kayatna kadagiti agilinlinteg, nangruna iti Kamara. Nakitatayo ti pannakaaramat ti pork barrel  kadagiti proyekto ken inprastruktura a kaadduanna ti saan nga agbayag ken nadaras a madadael gapu ta substandard wenno nababa ti kalidadda.

Iti nalawlawag a pannao, ti pork barrel ti kangrunaan a pagtaudan ti korapsion agsipud ta ad-adu met a paset ti pondo ti mapan iti bulsa dagiti agtuturay ken politiko idinto a sagsagannit ti maipan kadagiti nadumaduma a proyekto.

Ad-adda a saruronganmi ti estratehia ti Malakaniang a mangpabassit iti depisit ti budget babaen ti panangkissayna iti pork barrel dagiti agilinlinteg ngem iti mangipakat iti baro a buis kadagiti umili. No pudno a nadarisay ti panagserbida kadagiti umili, saan koma a samiren dagiti agilinlinteg a maikkatan ti pork barrelda. Maituredda kadi a kitaen a maipabaklay ti sabali pay a buis kadagiti umili nga agkubbo payen iti kinarigat ti biag?

Ti problema laeng, no awanen ti nabatbati pay a konsensiada.#