Footer

Kuestion ti isusurot ti city administrator iti kampania iti eleksion, sungbatanna iti umisu a tiempo ken lugar: Mayor Eva

VIGAN CITY – Kinuna ni Mayor Eva Marie S. Medina a mabalin latta ni Konsehal Constante Benzon nga idatag sadino man a kayatna ti kuestionna mainaig iti mapapati nga isusurot ti city administrator iti bunggoy ti mayora bayat ti panagkampaniada para iti eleksion idi Mayo 10, 2010 ket sungbatanto ti city administrator iti umisu a tiempo ken lugar.

“…City Administrator Alquiza is mature enough, intelligent enough a mangsungbat kadagita,” kinuna ni Medina bayat  ti interbio kenkuana ni Peter Rebunal itay nabiit.

Inruar ni Benzon daytoy a kuestionna iti sessionda idi Hulio 12 bayat ti pannakatratar ti reappointment ni City Administrator Milagros Alquiza kas administrador ti siudad iti babaen ti Opisina ti Mayor.

Bayat ti question hour, dinamag ni Benzon ken ni Alquiza no maipalubos a sumurot iti panagkampania ti mayora uray kabayatan ti oras ti panagopisina.

“Wen, agsipud ta co-terminus ti puesto ti city administrator iti biang ti city mayor,” insungbat ni Alquiza.

Gapu ta saan a mapnek iti sungbat ni Alquiza, kiniddaw ni Benzon ken ni Sangguniang Panlungsod Secretary Jason Avila a mangipatulod iti letter of inquiry iti Civil Service Commission wenno iti Department of Interior and Local Government mainaig iti kuestionna.

Ngem kinuna ni Medina nga uray sadino ti pangidatagan ni Benzon iti kuestionna, sungbatanto ni Alquiza.

Innayon pay ti mayora a dina pinili ni Alquiza a city administrator “no saanko a matalek nga ammona ti ob-obraenna ken sasawenna.”

Kabayatanna, kinuna ni Alquiza idi madamag no ania ti sakup ti pagrebbenganna a kas city administrator, nga isu ti support officer iti opisina ti mayor ken dagiti nadumaduma a dadaulo ti departamento ti siudad ken adda ammona iti local governance.

Nadutokan ni Alquiza a city administrator manipud idi 2001 a panagtakem ni Mayor Eva Marie S. Medina a kas mayor.

Iti naangay nga eleksion idi Mayo 10 daytoy a tawen, nailayon ni Medina a kas mayor nga awan ti kinasangona.

Kalpasan ti deliberasion, inaprobaran ti konseho ti reappointment ni Alquiza kas city administrator babaen ti butos a 10-1. Ni laeng Benzon ti bimmutos a saan a pabor iti panagtuloy ti serbisio ni Alquiza.#