Footer

Singasing a di pannakaipalubos kameng ti media mangkober iti session, nababalaw

STA. CATALINA, Ilocos Sur – Naglak-am iti pannakababalaw ti maysa a konsehala gapu iti  panangidagadagna a mapawilan dagiti kameng ti media a mangkober iti panagsession ti sangguniang bayan ditoy.

Bayat ti sessionda idi Hulio 15, kiniddaw ni Konsehal Violeta Reotutar ti saan a pannakaipalubos dagiti kameng ti media a mangkober iti regular sessionda tunggal Lunes.

“Dawatek koma … dagiti kameng ti media a no mabalin saanda koma nga aggian iti uneg ti pagsessionantayo tapno iti kasta naur-urnos ken nataltalna iti intay panagpapatang,” indawat ni Reotutar kadagiti kabaddungalanna iti konseho.

Kinuna pay ni Reotutar a no adda man konsehal a kayat a kainnuman dagiti kameng ti media, iti ruar ti pakaisayangkatanna kalpasan ti session.

Gapu iti daytoy, maysa a komentarista iti radio ti nangbabalaw ken ni Reotutar iti daytoy nga insingasingna idinto nga imbatadna a maysa daytoy a pananglapped iti nawaya a panagirakurak.

Kinuna ni Jun Ramos, anchor ti Barangay Commando Brigada a maysa a pananglapped iti wayawaya ti prensa ti inaramid ni Reotutar.

Nagsasaruno dagiti text messages a naggapu kadagiti agdengdengngeg iti programa ni Ramos a nangkritikar iti nasao a konsehal iti panangisingasingna ti saan a pannakaipalubos ti media a mangkober iti sessionda.

Sakbayna, iti report ti komite nga indatag ni Konsehal Jonathan Refuerzo, chairman on committee on rules, inrekomendana ti pannakaamendar ti internal rules and procedures a sursuroten ti konseho kas ti pannakaiparit ti panagsasarita wenno panagkomento dagiti observers, bisita ken dadduma pay no saan a pagsaludsodan ida ti august body, ti panaggianda iti naituding a lugarda ken saanda a panagwarawara bayat ti session, ti panagaruat iti maikanatad a kawes dagiti tumabuno iti pagsessionan, ti pannakadawat ti pammalubos ti konseho mainaig iti pannakaaramat dagiti ramit komunikasion iti uneg ti pagsessionan ken dadduma pay a paglintegan tapno naurnos ken naannayas ti panagsession.

Inrekomenda pay ti nasao a komite ti pannakapapanaw wenno saanen a pannakaipalubos pay a sumrek iti pagsessionan ti asinoman nga aglabsing kadagiti paglintegan.

Iti napalabas, maysa a lokal a broadcaster a mangkobkober iti session ditoy ti pinadas ti maysa nga opisial  a maideklara a persona non grata gapu iti komentariona mainaig iti nasao nga opisial.

Saan a dimmur-as ti nasao a proposal.#

Comments are closed.