Footer

2 kameng ti CAFGU, napaltogan

SINAIT, Ilocos Sur – Dua a kameng ti Citizen Armed Force Geographical Unit (CAFGU) ti napaltogan iti uneg ti kampoda iti Barangay Nagcollooban ditoy nga ili iti sardam ti Hulio 16, 2010.

Naitaray da Rafael Esteban y Blas, 34, naasawaan, residente iti Barangay Paltit, Badoc, Ilocos Norte ken Mario Vidad y dela Cruz, 28, naasawaan, residente iti Barangay Nagcollooban, Sinait, Ilocos Sur iti Corpuz Clinic and Hospital sada naiyalis iti Mariano Marcos Memorial Hospital Center, Batac City, Ilocos Norte.

Segun iti inisial nga inbestigasion, madama ti panagpatrolia ni Arnel Yasay y Agpaoa, 25, baro, residente iti Barangay Labut, Badoc, Ilocos Norte idi aksidente a nakalbitna ti gatilio ti paltogna a nakapaltogan ti tian ken kannawan nga ima ni Esteban. Maysa a naiwawa a bala ti nakasugat iti kanawan a saka ni Vidad a matmaturog iti dayta a kanito.

Boluntario a simmuko ni Yasay iti Badoc police station ngem naipaima met laeng iti Sinait police kalpasanna.

Kabayatanna, napaltogan ti maysa a negosiante bayat ti panaginomda iti Barangay Quezon, Cabugao, Ilocos Sur idi agsapa ti Hulio 18, 2010.

Naitaray iti Suero Clinic and Hospital ni George Naval y Singson, 37, naasawaan, negosiante, residente iti nadakamat a barangay para iti pannakataming ti sugatna iti saka a mapapati a gapuanan ti cal. 9 mm kas maibatay iti dua a kapsula iti nakapasamakan ti pammaltog.

Iti inisial nga inbestigasion, agin-inom da Naval ken sumagmamano a kaduana idi nagsardeng ti maysa a Honda Wave motorcycle ket pinaputukan ti di pay nabigbig a suspek ti grupo.

Di pay ammo ti motibo ti pammaltog.#

Comments are closed.