Footer

Balay Taripato: kaimudingan ti intedna kadagiti agmaymaysa a lallakay ken babbaket (Umuna iti dua a paset)

Saan a nailaksid iti imatang dagiti dimmar-ay a sangaili iti pannakaiselebrar ti umuna a tawen nga anibersario ti Balay Taripato idi Hulio 8, 2010 ti naidumduma a rimat a maanninawan iti mata dagiti lallakay ken babbaket bayat ti panagkanta ken panagsasalada kas paset ti nasao a selebrasion.  Naisangsangayan ti ragsak a naimaldit kadagiti rupada ken nagayad nga isem ti timmamdag iti bibigda idi nabara a sinipatan ida dagiti nurses ken caregivers a mangas-asikaso kadakuada iti inaldaw-aldaw, makatawenen sipud naipasdek ti Home for the Aged babaen ti initiatibo ni Vice Gov. Deogracias Victor Savellano idi isu pay ti gobernador ti probinsia.

Wen, iti uneg ti makatawen a panagnaedda ditoy, dakkelen ti simmayaatan dagiti residente saan laeng iti pisikal no di pay iti emosional a kasasaadda.. Idi, adu kadakuada ti nakapsut unay; adda dagiti nalusiaw ken nabessag gapu iti kinakurang ti sustansia nga ipapaunegda; saan payen a makabangon ti dadduma ken sumagmamano ti agkabawen, ngem iti daytoy nga aldaw, makatawen itan sipud naipasidongda iti Balay Taripato, nakasarsarantada ken ingget lawag ti rupada a nagpabuya kadagiti sangaili.

Manipud ngamin idi maiserrekda iti Balay Taripato, naibilangda a paset ti maysa a sibubukel a pamilia, kasungani ti kinaagmaymaysa  a sagsagrapenda sakbayna gapu ta awanen dagiti ipatpategda iti biag ken nabaybay-andan a mangilangoy iti bagbagida iti inaldaw a panagbiagda. Ngem ditoy maikadua a pagtaengan a nakaipasidonganda, naipaay amin a kasapulanda manipud iti nasustansia a taraon, napipintas a kawes, nasayaat a paggianan agraman pagiddaan ken addaanda iti naaanus a nurses ken caregivers a mangkitkita ken mangay-aywan kadakuada.  Adda laeng met iti sango ti pagtaenganda ti Magsingal District Hospital a pakaipanan dagiti agsakit a residente. Libre amin dagitoy. Malaksid iti dayta, adu pay dagiti pribado a tattao a mapan mangited iti donasionda a makan kada luplupot kas tulongda kadagiti babbaket ken lallakay.

Babaen ti pannarabay dagiti nurses ken caregivers, adda dagiti rebbengenda tapno mariknada nga adda pay la kaimudinganda iti paggargarawanda a kagimongan. Adda dagiti nadumaduma nga aramidenda iti inaldaw tapno saanda a makarikna iti panagsalimuot. Iti bigat kalpasan ti panag-ehersisioda, mapanda iti likod ti pasdek tapno asikasuenda ti gardenda a nakaimulaan dagiti agduduma a natnateng. Adda naituding nga oras a panagtutungtongda, kas paset ti sosialisasionda a ‘sangkapamilia’. Iti weekend, maipasiarda pay iti nadumaduma a lugar kas iti igid ti baybay tapno makapagrelaksda.  Iti Domingo, mapanda pay makimisa iti simbaan wenno no dadduma mismo payen a ti padi ti mapan iti Balay Taripato tapno ipaayna ti spiritual a kasapulanda.

Agduduma nga estoria, ken agduduma a padas a kaadduanna ti naladingit ken kaarigda ti krus a padagsen ti kullapit a barukongda ti imet dagiti babbaket ken lallakay idi simrekda iti Balay Taripato.

Ngem iti unos ti makatawen, in-inut a naiwaksida dagitoy nalidem a sinagrapda ket kas iti nakuriteg a mula a natartaripato iti babaen ti nadungngo nga ima, nangrugi a simmanikar ken limmangtoda ket itan, saanen a ganggannaet ti isem iti bibigda, addan raniag a masirayan iti matada, nalawlawagen ti sirmatada iti nabatbati pay nga aldaw iti panagbiagda.

Ditoy a nasaksiantayo ti nadumaduma a ladawan dagiti agindeg.  Adda tay baket a natarabit ken natarus ti panagsaritana iti Ingles. Wen a ta sigud gayam nga English teacher daytoy ngem saan a nakiasawa. Gapu iti kinalaingna nga agsao, binirngasan dagiti kakaduana iti Balay Taripato iti speaker of the house.  Idi kinaumanmi, ay saannan a kayat nga ibbatan ti mikroponomi bayat ti pananglagipna iti napalabas. Kinunana a kasla munmunieka ti kapintasna idi ubing ken adu ti nagarem kenkuana ngem awan kadakuada ti nakatukay iti riknana.

Ngem adda met dagitay naulimek. Dida kayat ti makipatang  aglalo no sumro kadakuada ti “sumpong” a kunada.

Adda met tay lakay nga adda bassit a gitarana. No makalagip, paalana tay gitarana ket kurengrengenna daytoy sana ipallailang dagiti paboritona a daan a kanta iti Kailokuan, kankanta a naragsak ken naliday, nga iti naminsan, iti adayon a napalabas, nagbalinda a namaris a paset ti kinaagtutubona.

(Maigibusto)