Footer

INDAYON NI LAGIP: Nakasalda nga ayat (Tuloyna)

Inan-anusak pay la ti simrek a saleslady. Pagur-urayak iti nataltalged a pagsapulan.

Maysa nga aldaw, naragsak nga impakaammo ni Brenda nga adda nagbakante iti paktoria a pagtrabahuanna. Para pigket iti label  iti produkto. Inrekomendanak kano ket kayatnak a makita ti bossna.

Kabigatanna, sinapsapak ti bimmangon. Saannak a simrek iti pagtagilakuan. Inis-isuak a nalaing ti bagik. Diak kayat nga adda pamilawan ti mangimatmaton iti paktoria. Kuna ni Brenda a naestrikto daytoy.

Nabayag a miningmingannak ti mangimaton idi maiyam-ammonak ni Brenda.  Marius Arista ti nakakabil iti sangkap iti sangona.Nagtung-ed idi agangay.

“Sige, mangrugikan inton bigat,” kinunana.

“Maraming salamat po,” nakunak.

“’Wag mo akong pupuin, bata pa naman ako,” umis-isem nga insungbat ni Marius.

‘Oy, tinamaan ‘ata ni boss sa iyo,” nakuna ni Brenda. “Tattak la a nakita nga immisem.”

“Sus, amin la a mapalpaliiwmo,” nakunak.

“Ngem agannadka kenkuana. Adda asawanan, sika.”

Diak intaltaleken ni Brenda. Sabali ti ayuyang ti panunotko. Adda met laengen natalged a pagsapulak. Makaurnongak met ngatan iti pagadalko.

Naglabas dagiti bulan. Medio addan bassit naurnongko. Nalag-an ti riknak iti inaldaw agsipud ta iti panagkunak, agmata met laengen ti arapaapko.

Nasayaat kaniak ni Mang Marius. Kasta ti kayatna nga awagko kenkuana no paayabannak iti opisinana. Adu ti sinalsaludsodna maipapan kaniak. Kalpasan ti innem a bulan, ingngatona ti sueldok. Ad-adda manen ti sutil kaniak ni Brenda.

Naminsan, bayat ti panagsagsaganak nga aggawid, pinaayabannak ni Mang Marius.

“Adda kadi papanam?” inamadna. “Agpakuyogak koma kenka nga agpili iti iregalok ken ni Maila. Agkasangay ngamin inton Sabado.”

Kakaisuna nga anakna ni Maila. Agtawen iti sangapulo.

“Ay, baka di magustuan ni Maila diay pilik, sir,” nakunak.

“Hamman,” kinunana. “Urayenka dita baba.”

Saannakon a nakapagkitakit. Namrayak laengen iti nagtung-ed.

Imbagak ken ni Brenda ti kiddaw ni Mang Marius. Sinutilnak manen. Ngem pinalagipannak manen nga adda asawa ni Mang Marius.

Manipud idin, masansan a pakuyog ni Mang Marius kaniak no adda gatangenna. No kasdiay a marabiankami, mangrabiikami pay iti paboritona a panganan sanak itulod iti pagkaseraak.

Mababainak payen ta mariknak nga umapal kaniak dagiti dadduma a katrabahuanmi. Ken masansan a masaludsodko iti bagik: adda kadi nalimed a panagayat kaniak ni Mang Marius? Ngem awan met ti makitak a kaadda ti sabali a panggepna kaniak. Ketdi, nalag-an ti riknak no addaak iti abayna. Anian a naggasat ti asawa ni Mang Marius, nakunkunak iti bagik.

Nagdamdamagak ken ni Brenda maipapan iti asawa ni Manong Marius. Nalatak a corporate lawyer.  Naingrata kano. Awan panangipirpiritna ken ni Mang Marius. Siguro gapu ta maysa laeng a manager iti bassit a paktoria ti kankanen. No umammingaw iti paktoria, adu kano dagiti ungtanna iti bassit la a panagbiddutda.

Saan kano a naragsak ni Mang Marius iti denna ni Arlene nga asawana. Di pay kano nakita da Brenda a nagkuyog dagitoy.

Kasta ti panagannayas ti biagko. Iti biangko, mapnekakon iti daytoy a kasasaadko. Dumakdakkel ti urnongko. Kaipapananna dayta ti asidegen a panagbasak ken pannakatungpal dagiti arapaapko.

Ngem nagbaliw amin idi nagsakit dagiti nagannak kaniak!

(Adda tuloyna)

Comments are closed.