Footer

Libre a purified water, maidanon iti barbarangay

TAGUDIN,  Ilocos Sur – Agtultuloy ti panangidanon ti gobierno probinsial kadagiti 768 a barangay iti Ilocos Sur ti Mobile Water Purification Plant “Serving Purified Drinking Water for the People”, daytoy ti impakaammo ni Gov. Luis “Chavit’ Singson itay nabiit.

Kaudian a sinerbian ti nasao a planta dagiti residente iti Barangay Bitalag, Tagudin idi Hulio 14 babaen ti kiddaw dagiti opisial daytoy a barangay.

Nagmalmalem a nagited iti nadalus a danum ti nasao a purification plant kadagiti bumarangay.

Segun ken ni Lito Artatez, operator ti planta, kas kadagiti magatang a purified water a dumalan ti danum iti makunkuna a reversed osmosis.

Kanaig daytoy, nagyaman ni Brgy. Capt. Manuel La Torre iti idadateng ti proyekto iti barangayna ta adu a kabarangayanna ti mabenepisiaran iti pannakaidanon ti nadalus a danum nga inumenda.

“Saan pay met ketdi a kontaminado ti danum iti barangaymi  ta in-inumenmi met ti danum kadagiti bubon ken gripomi ngem kaaduan a bumarangay ti gumatgatang iti purified water nga inumen dagiti ubbing,” kinuna ti kapitan.

Kinuna met ni Melinda Flores, maysa kadagiti pimmila a residente, a nakainut isuna iti budget gapu ta mabalinnan nga igatang iti sidaenda ti igatangna koma iti mineral water nga usarenda iti makalawas.

“Nakainutkami iti budget. Sapay koma ta maulitto manen ti iyaayda iti barangaymi,” kinuna ni Flores.

“Importante ti salun-at dagiti ubbing isu a masapul a nadalus ti danum nga inumenda,” kinuna met ni Ms. Elizabeth Bulosan, maestra iti Bitalag Elementary School idinto nga innayonna a dayta ti makagapu a binaonda dagiti sumagmamano nga adalanda a makipila para iti pannakakarga dagiti water containerda tapno makaalada iti purified a danum.

Proyekto ni Singson ti pannakaidanon ti nadalus a danum kadagiti barangay iti probinsia babaen ti Mobile Water Purification Plant.

No kayatyo ti agrequest iti iyaay ti proyekto iti barangayyo, tumawag laeng iti (077) 722-7186 wenno iti 09184622345.#

Comments are closed.