Footer

Mangngalap, nakaalimon iti pigaran nga ikan, natay

SAN ESTEBAN, Ilocos Sur – Maysa a mangngalap a residente iti Barangay Apatot ditoy nga ili ti natay gapu iti panagsullat ti naalimonna nga ikan iti karabukobna.

Natay iti ospital a nakaitarayanna ni Edward Cancas, 22, baro, residente iti nadakamat a lugar, agsipud iti saan a dagus a pannakaikkat ti kurapo, ikan a pigaran, a naidalubdob ti pigarna iti karabukobna.

Segun iti report, napan nagpana ti biktima iti pangaldawda iti katangriban a paset ti baybay a sakup ti Barangay Apatot ket maysa a kurapo ti napanana.

Mapapati a kinagat ti biktima ti ulo ti ikan kas nakairuamanda a pangpatay iti daytoy ngem nagkuripagpag ti ikan ket naalimonna.

Saanen a naikkat ti biktima ti ikan gapu ta naidalubdob ti pigar daytoy iti karabukobna.

Mapapati nga inkarigatan ti biktima ti naglangoy a nagpaigid sana impakleb lattan ti bagina iti bato iti asideg ti takdang sa nagpatulong iti maysa nga ubing.

Iti panagreport ni Konsehal Marvin Ong iti DWRS, kinunana a nagpaarayat ti ubing a kadua ti biktima babaen ti panagpayapayna ngem saan nga intaltalek dagiti lumabas a bumarangay.

Mapapati nga adda pay bassit nga anges ti biktima idi intarayda iti ospital ngem saanen a naidanon pay a sibibiag.

Segun iti doktor a nangtaming kenkuana, naisalakan koma ti biktima no naisapsapa a naitaray iti ospital agsipud ta nadarasna nga inikkat ti ikan a naisullat iti karabukob ti biktima.

Kabayatanna, binuangay ti gobierno munisipal ditoy ti bukodna a Bantay Dagat tapno maaywanan ti kabaybayan a sakup daytoy nga ili kontra iti illegal a panagkalap.

Kinuna ni Mayor Chester Elaydo a nangpilida iti Bantay Dagat Brigade a pakaibilangan da Rodolfo Baldeviso, Sr., Cesar Quilaosing, Reynante Diga, Marlon Trinidad, ken Wilson Gamboa.

Kangrunaan a bantayan ti Bantay Dagat Brigade ti fish sanctuary project a masarakan iti sitio Lipit, Barangay Apatot, ditoy nga ili.

Nagdalan iti briefing dagiti napili a Bantay Dagat Brigade babaen kada Benedicto Saraos, law enforcement officer ken fish examiner ken ni Ricardita Tubon, provincial FARMC coordinator.#

Comments are closed.