Footer

Pannakakongkreto dagiti kalsada probinsial, indagadag ni Bokal Singson

VIGAN CITY – Babaen ti maysa a privilege speech, indagadag ni Bokal Jerry Singson ti pannakaited ti prioridad kadagiti provincial roads.

Indanon ni Singson daytoy iti umuna a panagsession ti sangguniang panglalawigan idi Hulio 20 kalpasan ti panagtugawda idi  Hulio 1.

Segun iti bokal, iti napalabas nga administrasion, adda clamor dagiti nongovernment organizations a maikkan dagiti provincial roads iti prioridad a makongkreto ngem dagiti municipal ken barangay roads ti inikkan ti gobierno probinsial iti prioridad kas kiddaw dagiti barangay ken municipal officials.

Innayon ni Singson a daytoy ti napasamak ket pinunpunduan ti gobierno probinsial ti pannakakongkreto dagiti municipal ken barangay roads.

Kinuna ni Singson a no lawlawen ti probinsia, dagiti provincial roads laengen dagiti saan a nakongkreto.

“…It’s about time that the provincial government to give priority to the concreting of all provincial roads throughout the province,” kinuna ni Singson idinto nga innayonna nga adda umdas a pondo nga agtaud manipud iti bingay ti probinsia iti RA 7171.

Kasungani iti napalabas a dua a lawas nga awan ti quorum, kumpleto dagiti kameng ti sangguniang panlalawigan a nagatendar iti sessionda idi Hulio 20.

Iti daytoy a gundaway, nagtrabaho a dagus dagiti bobokal ket nagbubutosanda dagiti mangidaulo kadagiti nadumaduma a komite.

Manipud iti 23 a komite iti napalabas a hunta probinsial, nagbalinen a 25 dagiti komite iti baro a hunta probinsial ti Ilocos Sur ta adda napagsina ken nainayon a komite.

Napagsina ti committee on education and culture tapno agbalin a committee on education ken committee on culture and arts idinto a nainayon ti committee on transportation. (Basaen iti panid 3 ti kumpleto a komite ti sangguniang panlalawigan ken dagiti mangidaulo. -Ed)

Kanaig daytoy, indatag ni Singson ti maysa a draft resolusion a panagapelana iti provincial government ti Ilocos Sur a mang-prioritize iti konstruksion, rehabilitasion ken pannakamentener dagiti provincial roads iti amin a paset ti probinsia.

Impaima ni Gov. Deogracias Victor Savellano ti resolusion iti committee on infrastructure.

Kabayatanna, babaen ti panangilungalong ni SPM Jose Bunoan, Jr., chairman ti committee on labor, employment and civil service, inaprobaran ti hunta probinsial ti reappointment da Ma. Victoria Cu kas provincial administrator ken Atty. Maricel Tacata kas provincial legal officer.

“Masapul ti pannakaaprobar a dagus ti reappointment dagiti dua ta kasapulan unay dagiti posisionda iti inaldaw-aldaw a panaggaraw ti kapitolio,” kinuna ni Bunoan.#

Comments are closed.