Footer

Pannakalugi ti NFA, saan a mismanagement: NFA chief

BANTAY, Ilocos Sur – Nupay agpukpukaw ti National Food Authority, saan a maigapu iti saan a nasayaat a pannakamaneharna no di gapu iti pammilin ti nangatngato a turayenda nga aggatangda iti nangina iti irik sada ilako a bagas iti nalaklaka a presio.

“Kayatko nga ilawlawag a ti pannakaluglugi ti NFA saan a gapu iti mismanagement… no di ket iti instruksion ti top management nga aggatangkami iti irik a nangato sami ilako a bagas iti kalakaan a presio,” kinuna ni NFA provincial officer Fortunato Bulao kas reaksionna iti awag a ma-abolish ti NFA gapu ta agpukpukaw daytoy nga ahensia.

Kinuna ni Bulao nga iti “daytoy a negosio, gumatangkami iti nangina sami ilako iti nababa, talaga nga aglugi ti NFA.”

Linagidaw ni Bulao ti awag a pannaka-abolish ti NFA gapu iti panangrunaw daytoy iti pondo ti gobierno sana innayon a kitaen koma dagiti kritiko a “dagitoy a pukaw ket isuda ti social nga obligasion ti gobierno tapno napintas ti food security ti pagilian”.

“No awan ti umdas a pempen a taraon ti maysa a pagilian, maysa daytoy a taudan ti riribuk,” kinuna ni Bulao sana inyunay-unay a “kritikal ti bagas agsipud ta maysa daytoy a political commodity.”

Kanaig daytoy, impakaammo ni Bulao a saan a nagbaliw ti presio ti bagas kadagiti market based outlets ta aglaklakoda iti P25 kada kilo.

“No adda man nagbaliw,  saanen nga aglako dagiti amin a community-based outlet ti NFA kas iti Tindahan Natin ken Tindahan ng Parokya iti P18.25 kada kilo a bagas no di maobligada metten nga aglako iti P25 kada kilo,” kinuna ni Bulao.

Kinuna ni Bulao nga adda pammilin ti nangatngato a turayenda kas paset ti panangrekobre ti ahensia kadagiti pukawna.

Impalgak ni Bulao a gatangen idi dagiti Tindahan Natin ken Tindahan ng Parokya ti lakoda a bagas manipud iti NFA iti P16.75 ket no sumaen, agpukpukaw ti ahensia iti P500 kada sako.

Ngem iti panagbalindan nga ordinario nga outlet, gatangenda iti NFA dagiti lakoda a bagas iti P23.50 sada ilako iti P25 kada kilo.

Kinunana a dagiti umili nga aggatgatang iti Tindahan Natin ken Tindahan ng Parokya ti maapektaran iti dakkel gapu ta aglako dagitoyen iti P25 kada kilo.#