Footer

Balay Taripato: kaimudingan ti intedna kadagiti agmaymaysa a lallakay ken babbaket (Maudi iti dua a paset)

Naliday ti pakasaritaan ti biag ni nana Alfreda Agustin. Medio saanen a nalawag ti panagkitana ken ad-adda a nakatugaw iti wheelchairna.

Saan a nakangato iti adal ni nana Alfreda. Nupay kasta, adda kabaelanda idi ken lakayna nupay saanda a naparaburan iti anak. Idi pimmusay ti asawana, nakipagnaed iti balay ti kasinsinna ngem saan a nasayaat ti panaglalangenda. In-inut a napukaw dagiti sanikuana agingga a saan unayen a makakita.

Agkedked idi ni nana Alfreda a maiserrek iti Home for the Aged ngem awan naaramidanna idi ituloddan iti Balay Taripato. Kadagiti immuna a bulanna ditoy, napalalo kan ti ladingitna ta malaglagipna ti napalabasna ken saanna nga ekspektaren a mapadasanna ti agnaed iti kastoy a lugar.

“Ngem itan, napalalo ti ragsakko iti kaaddak ditoy ta masagsagrapko ti dungngo ken asi dagiti agtuturaytayo. Dikam’ pulos makurkurangan iti taraon ditoy,” makalulua a kinuna ni nana Alfreda.

Kasano ngamin aya a napaadda ti Balay Taripato?

Nupay mamati ni Ilokano iti nairut a panaglalangen ti pamilia, saan a mailibak nga adu latta dagiti saan a maas-asikaso a lallakay ken babbaket iti Ilocos Sur. Pinadas nga inammo ti gobierno probinsial babaen ti panangidaulo ti provincial social welfare and development office no ania ti makaigapu iti daytoy. Dua a banag ti natakuatanda. Umuna, adda dagiti nataengan nga awanen ti pamiliada (saan a nakaasawa, addan iti adayo dagiti annakda wenno dagiti kakabagianda, awanen ti pagsapulanda) ken maikadua a rason, nupay adda pay laeng pamilia ti dadduma, saandan a mataraken dagitoy gapu met laeng iti kinapanglawda. Ngarud, kadagitoy a nataengan, saanda a mananam tay kunada iti Ingles nga “strong family ties”, maysa kadagiti ikut a talugading ni Filipino.

Idi Hulio 8, 2009 kalpasan a mapasimpa ti saan a maus-usar a pasdek iti likudan ti Magsingal District Hospital ken mapaadda dagiti ramit a kasapulan dagiti agindeg, nangrugi a maserbian dagiti abandonada a nataengan babaen ti Balay Taripato. Babaen met laeng iti mandar ni Gov. (idi) Deogracias Victor “DV” Savellano, inallukoyda dagiti abandonada a nataengan manipud iti nadumaduma a paset ti probinsia tapno agnaedda iti Balay Taripato.

“Dagiti nataengan  ti nangmuli iti napalabas ket nalabit a saantayo a kastoy ita no saan a gapu kadakuada. Ngarud, kas pangsupapaktayo kada Lolo ken Lola, ipaayantayo ida iti naan-anay a serbisio a sagrapenda agingga iti ilelennek ti initda,” kinuna ti gobernador sana inyunay-unay a silulukat latta ti nadakamat nga institusion nga agawat iti tulong manipud kadagiti addaan naayat a panagpuspuso.

Idi Abril, bimmisita ti CEO ti Hair Asia a ni Evelyn Alvaran Cruz ket nagited iti regalo kadagiti residente ditoy. Nangipaay pay ti Hair Asia iti libre a pukis ken nangibatida iti kompleto a ramit a pagpukis.

Mangnamnama dagiti mangimaton iti Balay Taripato nga adu pay ti tumulong ken mangsuporta iti daytoy a proyekto.

Iti pannakiuman ken ni Ferdinand Concepcion, mangidaulo iti PSWDO, kinunana nga agtultuloy a pumimpintas ti proyekto ket addan 15 a matartaripato iti Balay Taripato iti Magsingal idinto a 16 met iti Balay Taripato Annex iti Cabugao, Ilocos Sur.

“Sapay koma ta itultuloy ni Gov. Luis “Chavit” Singson daytoy tapno adu pay a nataengan a saan a maas-asikaso ti matulongantayo,” kinuna ni Concepcion.

Sisasagana ti PWDO nga umawat kadagiti mayat a maiserrek ditoy. Masapul laeng a mangipakitada iti referral letter tapno maammuan ti opisinana ti kasasaad ti maiserrek.

Ti Ilocos Sur ti kaunaan a probinsia nga addaan iti Home for the Aged nga igasgastosan ti gobierno probinsial. Napintas ngarud a pagtuladan daytoy dagiti dadduma pay a probinsia tapno saan a mabaybay-an dagiti nataengan iti lugarda. Babaen ti nasao a gannuat, maiparikna kadagiti lallakay ken babbaket nga adda pay la kaimudinganda iti gimong a paggargarawanda iti laksid nga agsalogen ti pigsada ken umadanin ti isasangbay ti rabii para kadakuada.#

Comments are closed.