Footer

BANNER NEWS: Mangngalap nga agisaysayangkat iti panagbongbong, nainget a masipsiputan

BANTAY, Ilocos Sur – Adda listaan ti kapolisan ditoy kadagiti mangngalap nga agisaysayangkat iti panagbongbong ket nainget a masipsiputanda, kas paset ti naing-inget a kampania maikontra iti illegal a panagkalap iti probinsia, segun iti PNP provincial director.

Kinuna ni Police Senior Supt. Eduardo Dopale, Jr., nga adda listaanda dagiti mangngalap a masuspetsa nga agus-usar iti bongbong ket isuda ti under surveillance wenno imonmonitor dagiti polis iti babaenna.

Impalgak ni Dopale daytoy kalpasan ti naballigi nga operasion nga insayangkatda iti pagtaengan ti maysa a mangngalap nga adda iti watch list dagiti agar-aramid iti bongbong  iti Sitio Panayogan, Barangay Daclapan, Cabugao, Ilocos Sur idi Hulio 28.

Napilaan iti kaso a panagsalungasing iti Seksion 3 ti RA 8294 iti provincial prosecutor’s office ni Alfredo Saniatan, Sr. y Vivit, 57, naasawaan, residente iti Sitio Panayogan, Barangay Daclapan, Cabugao, Ilocos Sur kalpasan a positibo ti panagsukisok dagiti nagtitipon nga elemento ti ISPPSC, PIB, Ilocos Sur PPO ken Cabugao police iti panangidaulo ni Police Supt. Emmanuel Reyes iti balay ni Saniatan idi agarup alas 5 ti agsapa ti Hulio 28, 2010 ken sinaksian dagiti opisial ti barangay.

Nakakumpiska dagiti nagsukisok iti balay ni Saniatan ti 2 botelia (bilog) ti arak ken maysa a botelia ti kuatro kantos a mapapati a naglaon iti potassium nitrate; 3 nga improvised explosives a naikabil iti 500 ml a botelia ti Sprite, 700 ml a botelia, ken 80 ml a botelia;  10 nga atiddog a safety fuses ken 100 a short safety fuses ken dua a pedaso ti posporo.

Sakbayna, iti miting nga inangay ni Gov. Luis “Chavit” Singson a tinabunuan da Dopale ken dagiti hepe ti polis dagiti nadumaduma nga ili, indagadagna ti naing-inget a kampania maikontra iti illegal a panagkalap a pakairamanan ti panagbongbong.

Ti pannakatiliw ni Saniatan ti positibo a resulta ti action plan nga inrusat ni Dopale kalpasan ti pammilin ni Singson.

Kinuna ti provincial director a nangbukelen iti barangay dagat tapno adda katulonganda a mangmonitor kadagiti mangngalap nga agus-usar iti bongbong.#