Footer

Dios ti agbati, Luzviminda (Maikatlo a paset)

“Awan ti agkuti iti dakes!” kinuna met ni Abel sana inuksot ti paltogna.  Nagsiput.

“Diosko!” inapput ti tagibian ti bibigna. Nalukag ti matmaturog nga ubing iti saklotna ket nailimog ti saning-ina iti anabaab dagiti pasahero.

“Agtalnakayo no diyo kayat ti madangran!” imbugtak ni Elias.

Timmakder ti maysa a lalaki a pasahero. Nabaneg. Langana ti makaitured. Nailasin ni Abel a ti badigard ni Mayor Fernando de la Cuesta. “Dinakam’ mabalin a butbutngen,” kinunana ket immaddang nga umasideg.

“Kayatmo ta patayabek ti bangabangam?” imbugtak ni Elias.

“Agtalnakayo,” imballaet ti stewardess. “Tungpalenyo ti bilinda.”

Immaddang latta ti lalaki, nakamesmes. Ngem sakbay a makadarup, pinasabtan ni Elias nga immalo ti putan ti paltogna. Naiparusisi ti lalaki. Kinugtaran ni Elias daytoy sana inyarabis ti paltog. Naarinuknok ti lalaki iti suelo.

“Asino pay ti aginlalaki kadakayo?” inwaras ni Elias ti matana idinto nga impaturongna ti paltog kadagiti lallaki iti sanguananna.

Awan ti nakaitured a simmungbat. Ngem makaipas ti kusilapda. Nasiputan ni Abel ti panagbanang-es ni Mayor Fernando de la Cuesta sakbay nga impusotna ti bagina iti tugawna. Tagidaksen la ketdi daytoy ti kaadda iti sabali a mangibilin iti aramidenna. Kenkuana a naibinggasen ti kinaturay iti kinataona, maysa daytoy a tungpa iti kinalalakina.

Nagrinnukod ti mata ni Abel ken ni Mayor de la Cuesta. Sige, agtignayka iti dakes ta malamalak ti bala ti kinarakam! nairidis ni Abel iti unegna. A, tagiimasenna la ketdi ti darikmat a makakita ti pannakarunaw ti kinatured ni Mayor de la Cuesta iti sanguanan ti bunganga ti paltog a mangipangpangta iti kanibusanan!

Ngem nasapa pay, simmiplot iti panunotna. Ninto Mayor de la Cuesta ti agbalin a sentro daytoy a pananghaydiakda iti eroplano. Daytoy ti kangrunaan a panggepda iti panangagawda iti eroplano, ti panangibutaktakda ti kinasiasino daytoy a politiko a murumor ti amin a kinadakes iti lugarda.

Ginuyod ni Elias ti stewardess sana inturong iti cockpit.

“Ibagam a luktanda ti ridaw!” imbilin ni Elias iti stewardess. Tinugtogna ti ridaw.

“B-buksan ninyo ang pinto!” kinuna ti stewardess.

Awan ti simmungbat iti uneg. Masinunuon ni Abel a nakadlawen dagiti piloto.

Inulit ni Elias a tinugtog ti ridaw.

“Luktanyo ti ridaw, no saan paltogak ti stewardess!” impangtana.

Naluktan ti ridaw. Kalmado ti piloto a nangtaldiap iti stewardess sa dagiti pasahero iti likudan ni Elias.

Insenias ni Elias ti panagsubli ti piloto iti tugawna.

Immuneg ni Abel iti cockpit. Pinaturonganna iti paltog ti pispis ti piloto.

“Ibueltam ti sasakayan iti airport,” imbilinna iti piloto.

“Agtutubo, dakkel a biddut daytoy nga inaramidyo,” kinuna ti piloto.

“Nalpasen nga insaruagmi ti iket, kapitan, saantayon a maisubli pay. Biddut man daytoy nga inaramidmi, daytoy laengen ti nabatbati a pamuspusan tapno maiwaragawagmi ti mensahemi iti nailian a turay ken iti sangalubongan.”

“Ania ti mensahe a kayatyo nga idanon kadagiti agtuturay?”

“Maammuamto. Sige, isublim ti eroplano iti airport.”

Nagtungpal ti piloto.

Rimmuar ni Abel iti cockpit kalpasan a napatalgedanna nga agsublin ti eroplano iti naggapuanna. Nagtakder iti sanguanan. Nairteng dagiti rupa a naiturong kenkuana. Nagsaltek ti panagkitana ken ni Padre Bernhart, ti Aleman a padi a mangimatmaton iti maysa a pagadalan iti Bigaa.

“Annak, basol iti Dios ti ar-aramidenyo,” nagtimek ni Padre Bernhart. Nasayud ti panagilukona. Nasuroken a duapulo a tawenna ditoy Bigaa.

“Dinakami bagbagaan, Padre Bernhart,” nagngirsi ni Elias. “Awanka iti pulpito.”

“Nabulsekankayo laeng, Annakko.”

“Dakayo ti bulsek, Padre. Bulsekkayo iti mapaspasamak iti aglawlawyo.”

“Dika maawatan.”

“Iti bangketa ken kaeskuateran ti Bigaa a sakupmo, agkalkallautang dagiti makasapul iti kaasi. Ngem ania ti ar-aramidenyo a pasurot ti Simbaan? Agdaldalikepkepkayo laeng.”

“Saan nga agpayso dayta! Ar-aramiden ti simbaan amin a kabaelanna a tumulong kadagiti marigrigat a kailiantayo.”

“Dinak pagkatawaen, Padre. Makitami ketdi ti kinagarbo ti panagbiagyo iti sanguanan ti kinapimpiman dagiti babassitan. No adda man itultulongyo kadagiti marigrigat, siping laeng ti kayariganda iti binaul a mait-ted iti simbaan a limos ken kadagiti pamastrekanna, kas iti pagadalan nga imatmatonam.”

Saan a nagtimek ni Padre Bernhart.

“Nagbalinen a negosio ti simbaan,” intuloy ni Elias. “Ar-aramatenyo ti nagan ti Dios a pagakup iti pirak!”

(Adda tuloyna)

Comments are closed.