Footer

EDITORIAL: Liderato a natibker iti pagtaktakderanna

Saluduanmi ni Presidente Benigno Aquino III iti panangipakitana nga adda durina a mangilinteg iti makitana a killo wenno saan a maiparbeng a naaramid wenno naipakat.

Nakitatayo daytoy iti panangibatadna wenno iti pammabalawna iti panagipuesto ni nag-Presidente Gloria Arroyo kadagiti kaaliadona kadagiti nangato a puesto ti ahensia wenno korporasion a kukua ti gobierno ken panangdutokna manen kadagiti nakapueston kadagiti maudi a lawas ti panagtakemna.

Nupay makuna a legal dagitoy nga inaramid ti nag-Presidente, ad-adda koma a narespetar no saanen a nagdutok manen wenno nagipuesto tapno itedna iti bien iti kabarbaro a Presidente a mangilugar kadagiti matalekna a kaduana a tumulong kenkuana para iti nasayaat a panangiturayna.

Kas iti aramidna iti napalabas, napeklan a sutil ni Arroyo a nangidaras kadagiti appointment dagiti nasinged kenkuana iti baet dagiti kritisismo a naibato kenkuana. Maibilang pay ketdi a panangsuot iti baro a liderato no adda met la durina a manglapsut iti daytoy a singgalut. Ita, arig natungpa ti dati a Presidente gapu iti natibker a panangipetteng ni Pres. Aquino nga ipuesto dagiti bukodna a kadua para iti nalawlawag a direksion a turongen ti turayna.

Dakamatentayo ti panangdutok ni Arroyo ken ni Associate Justice (idi) Renato Corona a chief justice ti Korte Suprema a dinan intulok a maited koma a gundaway ken ni Pres. Aquino a mangpili iti mangidaulo iti Kangatuan a Pangukoman. Sumangkautro met ta iti baet dagiti awag a saan nga awaten ni Corona ti puesto, di nangitaltalek ket arig nailimed pay ti panagsapatana iti sanguanan ni Arroyo.

Maysa nga insulto ken ni Corona ti imbatad ni Pres. Aquino a kaykayatna pay a maysa a barangay captain ti pagsapataanna ngem pagyamanan ta iti baet daytoy, nagtalinaed a natalna ti chief justice ket imbagana nga awan aniaman kenkuana asinoman ti pagsapataan ni Aquino. Nagsapata met laeng ni Pres. Aquino iti sanguanan ti maysa nga associate justice ngem naipalayen ti saan a nasayaat a langen, uray dida annugoten, iti nagbaetan ti Pangulo ken ti chief justice.

Dakamatentayo pay a gapu iti panangdutok ni nag-Pres. Arroyo ken ni Delfin Bangit, opisial nga asideg kenkuana, a kas AFP Chief, imbatad ni Pres. Aquino a dina kayat daytoy a chief of staffna, banag a nagtungpal iti nasapsapa a panagretiro ti opisial. Kadagiti managpaliiw, sabali pay a tungpa ken ni nag-Pres. Arroyo daytoy.

Iti daytoy a kasapa, naipakitan ni Pres. Aquino nga addaan iti bukod a disposision ken saanna a panagkir-in iti pagtaktakderanna kalpasan a nakapagdesision.

Iti daytoy a panawen a sumangsango ti pagilian kadagiti nagkaadu a problema, kasapulantayo ti liderato a natibker iti pagtaktakderanna iti aniaman a polisia ken direksion a pangituronganna iti gobierno.

Agtultuloy koma ni Pres. Aquino a saan a nalupoy ti pagtaktakderanna iti sanguanan dagiti adu a boses nga agpanggep a mangdiktar kenkuana.#

Comments are closed.