Footer

Ispekulasion mainaig pannakedetene ni Dip. Singson, naidawat a maisardeng

VIGAN CITY – Dinawat ni Bokal Jeremias “Jerry” Singson kadagiti kaprobinsiaanna iti dida panagipapan (speculate) mainaig iti pannakadetene ni Cong. Ronald Singson iti Hong Kong gapu iti mapapati a panagikutna iti maiparparit a droga.

“Dawatek kadagiti kalugarak, agkaykaysatayo nga agkararag bareng lumag-an daytoy tatta nadagsen a pasan a krus ni Apo Chavit ken ni Apo Congressman Ronald,” kinuna ni Singson idinto nga indagadagna ti saan koma a panag-speculate dagiti tattao… ta “ditay’ pay met ammo ti husto a naaramid….”

Kinuna ti bokal nga “ammotayo met ti rikna ti maysa nga ama (Chavit”), isu nga agkaykaysatayo koma nga agkararag tapno pumigsa ti pakinakemda ket malasatanda koma daytoy a pannubok.”

Nakigtot ti sangkaprobinsaan ditoy gapu iti damag manipud iti maysa nga aginaldaw a pagiwarnak a naaresto ni Cong. Singson iti Customs Arrival Hall ti Chek Lap Kok International Airport idi Hulio 11 gapu iti mapapati a panagikutna iti 26.1 grams a cocaine ken dua a tableta a diazepam wenno valium.

Kabayatanna, linagidaw ni Vigan Vice Mayor Ryan Singson ti pannakisawsaw dagiti dadduma a personalidad mainaig iti kaso ni Cong. Singson ket dinawatna a yurayda ti isasangpet ti kabsatna ta daytoy ti mangited iti statement “tapno maammuan ti hushusto a napasamak.”

Iti interbio ti bise mayor iti media, kinunana a “clueless” iti napasamak ken awan pay ti komunikasionda ken ni Cong.  Singson isu a marigrigatanda ta awan pay ti pakaammuanda kenkuana.

Segun ken ni Singson, naammuanna laeng ti napasamak manipud iti padamag ti maysa nga aginaldaw a nasional a pagiwarnak.

“Very closekami ken ni Cong. Singson ket masaksaktannak iti napasamak kenkuana,” kinuna ti bise mayor a kabbalay ti diputado iti pagtaengan daytoy iti Vigan City.

Nupay kasta, kinuna ti bise mayor a “very strong” ti manongna ket mangnamnama nga okay ti congressman iti baet daytoy a napasamak kenkuana.

Kinuna ti ub-ubing a Singson nga uray ni Gov. Singson ket dida pay unay nagpatpatang agsipud ta maawatanna ti karirikna ti amada.

Kinuna pay ti bise mayor a makitana itan dagiti pudpudno a gagayyemda idinto a linagidawna dagiti dadduma a di payen umasideg wenno umawag man la kenkuana kalpasan ti iruruar ti damag a natiliw iti Hongkong ti kabsatna.

Nagyaman ti bise mayor kadagiti nagipatulod iti mensahe ti pammatibker kenkuana ket “dagitoy ti mangted iti pigsak a mangituloy iti trabahok.”#