Footer

Lalaki a napaltogan iti biliaran, natay iti ospital

BANTAY, Ilocos Sur – Maysa a lalaki ti natay kalpasan a napaltogan iti maysa a biliaran iti Zone I ditoy nga ili iti agarup alas 8:30 ti rabii ti Hulio 28.

Natay iti Metro Vigan Cooperative Hospital ni Bryan Pacpaco Maregmen, 29, naasawaan, residente iti Zone I Bantay, gapu iti sugatna iti nadumaduma a paset ti bagina.

Napuntaan iti naiwawa a bala ni Delfin Pagud Inong, 17,  baro, kalugaran ni Maregmen, ket naitaray iti nasao met laeng nga ospital tapno maagasan ti sugatna.

Segun iti inisial nga inbestigasion, madama nga agay-ay-ayam da Maregmen ken ni Jake Rialubin y Pacis, 17, baro, residente iti Poblacion, San Vicente, Ilocos Sur, iti  biliar iti compound ti Pilar’s Lodging House iti nadakamat a barangay idi immasideg ti maysa a lalaki sana pinaltogan ti biktima iti namin-adu a daras.

Kalpasan ti pammaltog, naglugan ti suspek iti asul a motorsiklo nga XRM a naiparada iti ruar ti compound sada naglibas iti di met nabigbig a kaduana a nagmaneho iti getaway a lugan.

Segun iti maysa a saksi, stripe ti aruat ti pimmaltog ken nakakallugong idinto nga atiddog ti buok ti nakakallugong met a kaduana.

Nakasarak dagiti inbestigador kadagiti kapsula a nagtaud iti cal. 45 iti nakapasamakan ti krimen.

Di pay ammo ti motibo ti pammapatay ken ti kinaasino ti kriminal.

Kabayatanna, inaresto dagiti polis ditoy ti maysa a lalaki a sumangsango iti kaso a frustrated murder iti regional trial court ti Vigan City.

Inaresto dagiti polis ni Mario Paa y Domenden alias Mayong, 34, baro, welder ken residente iti Bulag East, Bantay babaen ti bileg ti warrant of arrest nga inyisio ni Judge Cecilia Corazon Dulay Archog ti RTC Branch 21, Vigan City maikontra ken ni Paa gapu iti kasona a frustrated murder a naka-docket iti babaen ti CC No. 6748.

Naituding ti P200,000 a piansa ni Paa para iti temporario a pannakawayawayana.

Iti pannakaisurat daytoy, adda ni Paa iti kustodia ti polis ti Bantay.#