Footer

Maulit ti historia a mabalud ti maysa a dati a presidente?

Maisaang ti Department of Justice no adda met la tangkenna a mangpalutpot iti dati a presidente ti pagilian gapu iti mapapati a panaglabsingna iti linteg mainaig iti National Broadband Network-ZTE deal.

Itay nabiit, nangipila iti Department of Justice ti Bayan Muna iti kriminal a complaint maikontra ken ni dati a presidente ken agdama a Congresswoman ti maikadua a distrito ti Pampanga Gloria Macapagal-Arroyo mainaig iti mapapati a pannakainbolbarna ken ti pamiliana iti anomalia iti nasao a proyekto.

Iti complaint ti Bayan Muna babaen ken ni Rep. Teddy Casiño, inakusaranna ni Arroyo iti panaglabsing iti Anti-Graft and Corrupt Practices Act, ti Code of Conduct for Public Officials ken ti Government Procurement Act gapu iti panangaprobar ti gobiernona iti NBN-ZTE project ket dinawatna iti DoJ a mangisayangkat iti serioso nga inbestigasion para iti pannakaukkon dagiti kanayonan nga ebidensia mainaig iti $329.48 million a kontrata iti nagbaetan ti NBN ken ti Zhong Xing Telecommunications Equipment (ZTE) Corporation.

Madakamat ditoy a nakansela ti nasao a proyekto gapu iti kontrobersia a pinataudna iti sanguanan ti alegasion a sobra unay ti pannakapresiona ken panagpanggep a panagpasuksok.

Kalpasan ti panangipilana iti complaint iti DoJ, kinuna ni Bayan Muna Representative Teddy Casiño a pangrugian daytoy kadagiti sumarsaruno pay a kaso a maipila kontra ken ni Arroyo tapno “bayadanna dagiti nagbasolanna”.

Panggep pay ti Bayan Muna ti mangipila iti kaso a plunder maikontra ken ni Arroyo.

Ngem ti saludsod: apay nga iti DoJ ti nagipilaan ti grupo ni Casiño iti criminal complaint a saan ket nga iti Ombudsman a nakaipabaklayan ti pannakaimbestiga dagiti akusasion ti korapsion maikontra kadagiti publiko nga opisial?

Ken ni Casiño, ad-adda nga agtalekda a magun-odda ti hustisia iti DoJ babaen ken ni ni Leila de Lima, kabarbaro a hepe daytoy, ngem iti Ombudsman agsipud ta ipanguluan daytoy ni Merceditas Gutierrez a nasinged iti pamilia Arroyo.

Madakamat ditoy a dinalusanen ti Ombudsman dagiti ag-Arroyo iti NBN-ZTE deal ket nakadarum ita iti panagkunniber da dati a Comelec Chairman Benjamin Abalos ken ni dati a NEDA head Romulo Neri.

Adda kadi pagbatayan ti DoJ a mangibaklay iti hurisdiksion mainaig iti nasao a graft complaint?

Segun ken ni de Lima, addaan iti autoridad ti DoJ nga agimbestiga kadagiti kaso a kriminal agraman iti panagsalungasing iti RA 3019 wenno ti Anti-Graft and Corrupt Practices Act a naipila maikontra kadagiti agdama wenno dati nga opisial ti gobierno kas maibatay iti memorandum of agreement a pinirmaan ti opisinana ken ti opisina ti Ombudsman.

Kinuna pay ni de Lima a sukimatenda a nainget amin dagiti rekord ken ebidensia tapno awan ti sabali nga opsion ti Ombudsman no di ti pannakaipila ti kaso iti Sandiganbayan.

Iti daytoy nga imbatad ni de Lima ken iti panangibilin ti Pres. Benigno Aquino III a pannakabuangay ti “Truth Commission” babaen ti panangidaulo ni dati a Supreme Court Chief Justice Hilario Davide, saganaan ni Cong. Arroyo dagiti agsasaganad a kaso a maisaklang kontra kenkuana iti Ombudsman.

Dakkel ti posibilidad a maulit ti pakasaritaan ti pagilian nga adda madusa a presidente gapu iti panagkunniber, kas ken ni dati a Pres. Joseph Estrada.

Mapasamak kadi dayta iti babaen ti administrasion ni Pres. Benigno Aquino III?#