Footer

Suspek iti masaker, natiliw iti La Union

SAN FERNANDO CITY – Inaresto ti nagtipon nga elemento ti Angeles City Police Office ken dagiti polis ditoy siudad  ti kangrunaan a suspek iti pannakamasaker ti maysa nga Amerikano a beterano iti gubat, ti asawana ken tallo a katulonganda iti uneg ti pagtaenganda iti Angeles City, Pampanga idi Hulio 22.

Innaganan ni La Union Police Director Senior Supt. Ramon O. Purugganan ti suspek a ni Mark Dizon y Zamora, 28, computer technician ken reflexology, residente iti Barangay Salapungan, Angeles City.

Nasarakan ti bangkay da Albert Mitchell, 70, US Air Force M/Sargeant, ti asawana a ni Janet Andrenada, 53, ken dagiti katulongda a nainaganan nga Isabel Fajardo, Marissa Prado, ken Yulberto Catli iti nadumaduma a lugar iti uneg ti pagtaengan dagiti biktima a masarakan iti Manuela Street, Hensonville Court, Barangay Malabanias, Angeles City.

Positibo nga intudo ti maysa a saksi ni Dizon nga isu ti nakitana a nagtaray a rimmuar manipud iti uneg ti pagtaengan da Albert Mitchel, Amerikano a beterano ti gubat idi malem ti Hulio 22.

Sumangsango pay ni Dizon iti kaso a panagkarnap iti Angeles City Regional Trial Court ken suspek iti dua pay a sabali a pammapatay a naisayangkat iti nasao met laeng a siudad.

Nakemmeg ni Dizon iti uneg ti pagpaknian iti plasa ditoy siudad iti agarup alas 4:00 ti malem ti Hulio 27 kalpasan nga immasideg ti amana iti polis tapno malapdan ti plano daytoy nga ikakappon iti New Peoples’ Army. Iggem dagiti polis ti warrant of arrest idi arestuenda ti suspek.

Naipaiman ti suspek iti kustodia ti Angeles City police office.#

Comments are closed.