Footer

4 natakaw a motorsiklo iti Laoag City, narekobre dagiti polis iti Vigan City

VIGAN CITY – Ibilang ti polis ti Laoag ken daytoy a siudad a natukkoldan ti duri ti maysa a grupo dagiti agtaktakaw iti motorsiklo kalpasan a natnag iti imada ti maysa a residente ditoy a pakaibuntogan dagiti motorsiklo sakbay a mailakoda.

Tiniliw ti nagtipon a grupo ti polis ti Laoag City ken Vigan City idi agarup 9:50 ti rabii ti Agosto 2, 2010 ni Michael Agup y Amistad, 28, naasawaan, residente iti Barangay IV ditoy siudad kalpasan nga intudo ti maysa a notorius a carnapper a nakabase iti Laoag City nga isu ti pakaipatpatulodan dagiti takawenna a motorsiklo sada mailako ditoy siudad.

Sakbayna, inaresto dagiti polis ti Laoag City ni Ryan Silvestre y Villanueva, 28, baro, residente iti Barangay XVI, Laoag City, maysa a notorious nga agtaktakaw iti motorsiklo iti nadakamat a siudad.

Kadua ti grupo ti polis Laoag City nga indauluan ni PCI Dominic Guerrero, deputy COP ni Silvestre a nagturong iti Vigan City ken nakikoordinarda iti polis ditoy tapno marekobre dagiti natakaw a motorsiklo.

Nagturong ti polis Laoag City ken Vigan nga indauluan ni PCI Ernesto Navarro, Jr., deputy COP, iti pagtaengan ni Agup ket bayat ti pannakapalutpotna, impudno daytoy dagiti nakailakuan dagiti motorsiklo.

Impaima ti polis Vigan dagiti uppat a motorsiklo a narekobreda manipud Sta. Catalina, San Vicente  ken Vigan City iti polis Laoag City.

Saan pay a narekobre ti uppat a motorsiklo nga inlako ni Agup agsipud ta dina ammo ti pagtaengan dagiti gimmatang ta mapapati nga iti langalang ti nakaisayangkatan ti transaksion.

Inimbataran dagiti polis Laoag City ni Agup para iti naing-inget a panagpalutpot mainaig dagiti natakaw a motorsiklo.#

Comments are closed.