Footer

BANNER NEWS: 6 polis a nakatiliw naghold-ap iti bus, padayawan ti SB San Esteban

SAN ESTEBAN, Ilocos Sur – Inaprobaran ti sangguniang bayan ditoy ti maysa a resolusion a mapadayawan dagiti innem a polis a nakatiliw kadagiti nagisayangkat iti panaghold-ap iti maysa a bus idi rabii ti Hulio 19.

Nairekomenda a maikkan iti komendasion da COP PInsp. Marcelo Martinez, Jr., SPO4 George Viloria, SPO2 Danilo Almalido, PO2 Alejandro Molina, PO2 Arnold Calzado, ken PO1 Glenford Pena gapu iti dagus a panagrespondeda a nagtungpal iti pannakatiliw ti dua kadagiti uppat a nanghold-ap iti Florida bus idi rabii ti Hulio 19.

Adda pay la iti kustodia ti polis ditoy da Melchor Beleno, 27, naasawaan, residente iti Barangay Gayaman, Luba, Abra, nagmaneho iti motorsiklo a getaway vehicle,  ken ni Federico Tadeja, Jr., 38, resi-dente iti Monquia, Dupax del Norte, Nueva Vizcaya gapu iti saanda a pannakaited iti pian-sada para iti temporario a wayawayada.

Dagiti nadakamat a polis dagiti nakaduty idi napasamak ti hold-ap ket dagus a nagresponde dagitoy a nangkamat kadagiti suspek a nagtungpal iti pannakatiliw ni Beleno.

Naglugan da Tadeja, Jiller Gayao, residente iti Barangay Agumanay, Luba, Abra, ken maysa a Peter a residente iti Barangay Tukipa, Luba, Abra iti Florida Bus a minaneho ni Jim Gatu y Menor, 48, naasawaan ken residente iti Barangay Poblacion II, Currimao, Ilocos Norte, iti Santa Lucia, Ilocos Sur ket imbagada iti konduktor a ni Allan Basilio y Navarette, 26, baro, residente iti Barangay 6, Laoag City, nga iti San Esteban ti pagdissaaganda.

Pinasardeng dagiti suspek ti bus iti asideg ti Flying V gas station a masarakan iti Sitio Bigbiga, Barangay San Nicolas sada inasut dagiti paltogda ken indeklarada ti hold-ap.

Kinasakas dagiti suspek ti P15,000 a koleksion ni  Basilio ken ti selponna a Nokia ken ti di pay ammo a kantidad manipud iti di nainaganan a pasahero a nakatugaw iti likud ti drayber.

Dimsaag dagiti suspek sada naglugan iti agur-uray a motorsiklo a minaneho ni Beleno ket naglibasda iti abagatan a direksion.

Nagresponde dagiti polis kalpasan a nagpulong kadakuada ti drayber ti bus ket nakamatanda dagiti suspek iti barangay road a sakup ti Santiago, Ilocos Sur.

Naglemmeng ni Tadeja iti kabakiran ti Ambucao, Santiago ngem simmuko kadagiti barangay officials gapu iti nakaro a bisinna ken ut-ot ti sakana a natudok iti kandaroma.

Madama ti pannakaanup dagiti dua pay a suspek iti nasao a panaghold-ap.#