Footer

Dios ti agbati, Luzviminda (Maikapat a paset)

Timmakder ni Mayor Fernando de la Cuesta. “Nasabrak ti panagbalbalikasmo, lalaki,” kinunana. “Dimo pay ammo a dayawen ti maysa a pasurot ti Dios.”

“Adda kadi Diosmo, Mayor?” kinuna ni Elias. “Ti la ammok a diosmo dagidiay rineppet ti lastiko nga idatag kenka dagiti kabo kalpasan ti bola ti hueteng!”

“Tarantadoka!” nakamesmes nga immaddang ni Mayor de la Cuesta.

“Sige, ituloymo ta diak pabettaken ta bangabangam!” kinuna ni Abel sana impaturong ti paltogna iti mayor.

“Naturedkayo laeng ta adda armasyo!”

“Ket sika, naturedka kadi no awan dagiti pasurotmo, mayor? Napadasam kadin ti nagna iti purok dagiti nababa ti adalna a ginundawayam ken inal-allilawmo iti nabayag a tiempo a didaka alikubkoben dagiti aso a badigardmo?” imbales ni Abel.

Kusilap ti insungbat ti mayor.

“Makaipas ti kinapudno, saan kadi, mayor?” manglalais ti timek ni Elias.

“Tanangem ti agsarsarita, agtutubo.”

“Ammok, nabilegka, Mayor. Ngem ditoy, dinakami mabutbuteng. Ditoy, saan nga agkurri ti kuartam. Ditoy, saankami a kas kadagiti takrot a kailianmi a maysa laeng a balikasmo, ibaagdan ti ipusda!”

Imbaw-ing ni Abel ti panagkitana. Matannawagannan ti eropuerto. Iti sikigan ti control tower, nataratar dagiti lugan. Ammonan a nagpakaammo ti piloto iti pannakahaydiak ti eroplano.

Naggiteb ti pispisna idi agpababa ti eroplano. Madamdama, pampanurnorenen ti sasakayan ti runway sa nagsardeng iti disso a nagrubbuatanna.

Pinaruar ni Abel dagiti piloto. Pinagtugawna ida iti abay ti stewardess.

Immaweng ti sirena. Immapiring ni Abel iti tawa. Laklakuben dagiti nadumaduma a lugan ti eroplano. Bimmaba dagiti polis sada nagpuesto iti ampir ti luganda, sisasagana dagiti paltogda.

Simrek ni Elias iti cockpit. Pinidutna ti auditibo sana kinontak ti control tower.

“Ni Major Agana daytoy,” adda simmungbat. “Siak ti hepe ti seguridad ti eropuerto. Nasaysayaat laengen a sumukokayo. No kumitakayo iti tawa, naalikubkobkayo kadagiti polis ken soldado.”

“Papanawem dagiti polis ken soldado, Major,” kinuna ni Elias. “Ita met laeng!”

“No saan….?”

“No saan, mapilitankami a pumatay!” Ikkandaka iti lima a minutos a mangpapanaw kadakuada!” intupak ni Elias ti auditibo.

Nagari ti ulimek. Kasla bomba ti pitik ti relo iti pungupunguan ni Abel a makidindinnaer iti banugbog ti barukongna. Timrem ti ling-et iti mugingna nupay nalamiis ti uneg ti sasakayan.

Nagkiring ti transmitter. Pinidutna ti auditibo. Ni Major Agana.

“Kayatko a mangeg ti pammatalgedyo nga awan ti madangran kadagiti pasahero sakbay a papanawek dagiti soldado.”

“Awan ti dakes a mapasamak kadakuada basta tungpalenyo ti bilinmi, Major,” insungbat ni Elias.

Immapiring ni Abel iti abay ti tawa sana tinannawagan dagiti nakaalikubkob a lugan. Nakaanges iti nalukay idi aglugan dagiti soldado sada pimmanaw.

Pinidut ni Elias ti auditibo. “Major Agana, kayatko a kontakem ni Baluigas,” kinunana. “Isu ti agbalin a rangtay iti dialogo iti nagbaetanmi ken iti gobernador.”

“Matungpal,” kinuna ni Mayor Agana. “Adda kadi pay sabali a kiddawenyo?

“Sumarsaruno dagiti dadduma kalpasan a makontakmi ni Baluigas.”

Kalpasan ti tallupulo a minutos, nagkiriring ti transmitter.

“Baluigas speaking,” nabosesan da Elias ken Abel ti periodista.

“Mr. Baluigas, basbasaek ti kolummo. Raemek ti kinaturedmo a mangibutaktak iti kinaruker dagiti agtuturay. Dayta ti gapuna a sika ti napilimi a mangidanon iti kiddawmi iti gobernador,” kinuna ni Elias.

“Kitaek pay nga umuna ti kasasaad dagiti pasahero.”

“Dida naan-ano.”

“Paneknekak pay.”

“Palubosandaka, Mr. Baluigas. Nasken kadi pay a palagipandaka a dika agaramid iti dimi magustuan tapno saan a maisagmak dagiti pasahero?”

“Diak kayat nga isugal ti biag dagiti pasahero.”

Di mabayag, nagsardeng ti nangisit a kotse iti sikigan ti eroplano. Dimsaag ni Baluigas. Intayagna ti imana kas panangipakaammona nga awan ti armasna.

Nagmattider ni Baluigas iti ridaw ti eroplano idinto nga impalawlawna ti panagkitana kadagiti pasahero.

“Am-ammokayo,” kinuna ni Baluigas. “Elias Malvar ken Abel Ibarra, dua a radikal nga agtutubo a masansan a mangidaulo kadagiti protesta ken rali kontra dagiti rinuker nga agtuturay.”

“Saankami a radikal, Mr. Baluigas,” kinuna ni Abel. “Kalinteganmi ti iruprupirmi.”

“Saan kadi a kinaradikal ti kastoy a wagas a panangirupir iti kalintegan?”

“Mababalawnakami kadi?” kinuna ni Elias. “Nagbalin a tuleng dagiti agtuturay iti ararawmi.”

“Ditayon a pagsupiatan dayta,” kinuna ni Baluigas. “Let’s get down to business. Ania dagiti demandayo?”

“Dua laeng, Mr. Baluigas,” kinuna ni Abel. “Kangrunaanna, kayatmi a mausig ken ikaro ni Mayor Fernando de la Cuesta iti pagbaludan ti pannakapapatay daydi Juan de la Cruz, Sr. ken iti pannakarames ni Luzviminda dela Cruz nga asawana!”

(Adda tuloyna)