Footer

Gabriela Silang General Hospital, maisina iti Provincial Health Office

VIGAN CITY – Naan-anayen a maisina ti Gabriela Silang General  Hospital iti Ilocos Sur Provincial Health Office. Daytoy ket kalpasan nga inaprobaran ti hunta probinsial bayat ti sessionda idi Agosto 3 ti inyendorso a resolusion ni Vice Governor Deogracias Victor “DV” Savellano a mangdawdawat ti pannakaisina ti nasao nga ospital a maysa kadagiti tartarawidwidan ti probinsia.

Iti public hearing nga inangay ti committee on health and sanitation nga idauluan ni SPM Jerry Singson, naanamongan a maisina ti GSGH iti PHO tapno ma-maximize ti access dagiti umili iti epektibo a serbisio iti salun-at ken hospitalisasion kasta metten a maipokus ti nasao a pasdek-pagagasan ti pannakaprebentar dagiti nadumaduma a sakit.

Iti programana a JCS, Kakibin iti Balligi, kinuna ni Bokal Jerry Singson nga iti daan a set-up, karaman ti PHO iti operasion ti GSGH ket no adda programa ti immuna, makiinnagawda iti pundo manipud iti GSHS, isu a “medio nagulo” ket iti panagsina dagiti dua, agsina ti pagrebbenganda ken maaddaanda iti bukod a pondoda.

“Naan-annayasen ti pannagna ti programa ti PHO agsipud ta addaanen iti bukod a pondo ken maipamaysana ti agpasiar kadagiti nadumaduma a district hospitals,” kinuna ni Singson.

Kinuna ni Singson a malaksid nga adda payen naaprobaran nga staffing chart, maisinanton ti building a pagopisinaan ti PHO ket diay la pondoda ti yur-uraydan.

Ni Dr. Carmeliza Singson ken ni Dr. Quezada dagiti nangato nga opisial ti PHO idinto a ni Dr. Winston Aguirre ti OIC ti Gabriela Silang General Hospital.

Segun iti bokal, nabara ti panangawat dagiti adda iti PHO ti pannakaisinana agsipud ta “nawayawayaandan ta addan bukodda a pondo ken maaddaanda metten iti bukod a programa.”#