Footer

Nangina a presio ti karne iti tiendaan ti Sinait, naireklamo

SINAIT, Ilocos Sur – Ti kayat lattan dagiti aglaklako a presio ti matungtungpal, daytoy ti maysa kadagiti sumagmamano a reklamo ti maysa a grupo a naipaima iti sangguniang bayan ditoy nga ili itay nabiit.

Iti maysa a surat a dimmanon iti sangguniang bayan ditoy, inreklamo ti Sinait Agbalbaliwka Movement a nakanginngina  ti presio dagiti magatang iti tiendaan publiko nangruna  iti karne ti baboy gapu ta ti kayat met lattan dagiti aglaklako a presio ti masursurot.

“Ipakaammomi man kadakayo dagiti maikaniwas a maar-aramid iti uneg ti tiendaan ti ilitayo a Sinait,” paset ti surat ti SAM nga imbasa ni SPM Secretary Edward Bautista bayat ti session ti sangguniang bayan sa naibatad ti  kinangina ti presio ti magatgatang iti tiendaan a “maysa daytoy a kinaagum iti ganansia… ken panangirurumen kadagiti gumatgatang kadagitoy a pagtagilakuan iti ilitayo….”

Dinakamat ti surat a pangina a pangina ti presio dagiti magatgatang iti tiendaan a pakaibilangan ti karne ti baboy, manok, baka ken nuang, agsipud ta ti kayat lattan dagiti aglaklako ti matungtungpal.

“Dagiti aglaklako ket ipanginada lattan ti presio dagiti karne iti tunggal kilo…” kinuna ti surat nga imbasa ni Bautista.

Inreklamo pay ti grupo ti kaadda dagiti suitik a pagkiluan iti tiendaan iti mailaklako nga ikan, karne ken natnateng.

Kinuna ti surat nga “awan ti umno a wagas wenno linteg no kasano a manayonan ti presio dagiti karne” ket “kayatna a sawen, ti la katkayatdan (aglaklako) a panangiyetnag iti presio.”

Kanaig daytoy, nagtignay ti sangguniang bayan tapno maikkan iti solusion ti nadakamat a problema babaen ti pananganamongda a maangay ti public hearing nga isayangkat saan laeng a ti committee on market and slaughterhouse nga idauluan ni Konsehal Jose Pepito Zapata no di payen ti committee as a whole.

Indagadag pay ti nasao a grupo ti ipapan dagiti agtuturay iti tiendaan tapno maimatanganda ti maar-aramid iti tiendaan.

Saan a nagpabigbig ti naggapuan ti surat a naipatulod pay ken ni Mayor Marlon Ines, Fr. Albert Rabe, kura paroko ti Sinait ken ti dadaulo ti Iglesia Filipina Independiente.#