Footer

P100,000 gunggona makatiliw iti drug pusher: Chavit

BANTAY, Ilocos Sur – Adda ited ti gobierno probinsial a gunggona kadagiti polis a makatiliw iti aglaklako iti droga, daytoy ti intanggaya ni Gov. Luis “Chavit” Singson bayat ti naisayangkat a ceremonial burning ti marihuana iti Camp Elpidio ditoy nga ili idi Agosto 5.

“Ikkak iti P100,000 ti makatiliw iti pusher. No  matiliwyo ta pumalag, makaammokayon,” kinuna ti gobernador idinto nga indagadagna nga ingetan ti kapolisan ti mangpugipog iti illegal a droga nangruna kadagiti pushers.

Indawat pay ti gobernador nga ituloy koma ti PNP ti panangtagibenda iti linak ken talna iti sibubukel a probinsia tapno agtalinaed ti napintas nga imahe ti Ilocos Sur.

Indauluan da PNP Regional Director Police Chief Supt. Orlando Mabutas, Provincial Director Police Senior Supt. Eduardo Dopale, Jr., Ilocos Sur Governor Luis “Chavit Singson, ken representante ti Philippine Drug Enforcement  Agency (PDEA) ti pannakapuor ti sangagumpo a mula a marihuana a paset ti P50.8 million ti pategna a marihuana a pinarut ken dinadael dagiti kameng ti PNP iti Barangay Caoayan, Sugpon, Ilocos Sur iti insayangkatda nga “Operation Raindrops” idi Hulio 9-10.

Itoy met laeng nga aldaw, sangapulo ket maysa a polis a karaman iti grupo a nangidaulo iti “Operation Raindrops” ti immawat iti Medalya ng Kagalingan a pakaibilangan da Police Chief Inspector Greg Guerrero, Police Insp. Jurex Urbano, Police Insp. Benjamin Zarate, SPO4 Elpidio Ponce, SPO4 Francisco Banglay, SPO3 Eustaquio Tacla, SPO2 Rodel Cabansag, PO3 Rodel Ponce, PO3 Carlos Apolong ken PO3 Pepe Venancio.

Inyawat pay ni Mabutas ti 43 a 12-gauge shotgun iti agduduma a police stations iti probinsia. Lima ti naited iti provincial office, saggapat iti Sinait ken Bantay idinto a sagdudua iti ili ti Cabugao, Magsingal, Sto. Domingo, Caoayan, Santa, Sta. Maria, San Esteban, Santiago, Galimuyod, Sta. Lucia, Sta. Cruz, Tagudin, San Emilio ken Salcedo.#

Comments are closed.