Footer

SALAYSAY: Agpanunot Sakbay Gumatang

No approved therapeutic claim. Mabasa daytoy a nakasurat kadagiti pakete, bote, garapon ken dadduma pay a nakaikargaan dagiti food supplements, herbal products ken dadduma pay.  Ngumato la ketdi ti kiday ken mapakudkod iti teltel dagiti dadduma a makabasa. Adda la ketdi agal-alikuno a saludsod iti mugingda: nalawag ngata a maawatan ti kaaduan daytoy wenno saan? Amangan no ultimo dagiti aglaklako ket dida maawatan dagita a balikas.

Napadasakon ti gimmatang kadagitoy a food supplements ken herbal products. Adda am-ammok a turabbet nga aglaklako kadagitoy a produkto ken suplemento ket namin-anon a beses a nagteks wenno pimmasiar kaniak tapno kumbinsirennak a gumatang iti produktoda. Adu pay dagiti agsasaruno a mangidiaya kadagiti lakoda a food supplements ken herbal products. Kesyo naggapu idiay Australia, USA, Great Britain, ken nadumaduma a nasion a madakamatda. Segun kadakuada, adu ti maagasan a sakit dagiti produktoda. Ngem pamrayak lattan ti umisem, agngilangil ken di agtimek.

Saan a nauma a mangkumbinsir kadatao daytoy nakunak a turabbet nga aglaklako. Agteks ken pasaray pumasiar iti balay. Iti naminsan, adu manen dagiti inruarna a nadumaduma a herbal products ken food supplements. Dimmikar ti nasutil a tuktokko ket dinamagko no ania ti kayat a sawen ti No Approved Therapeutic Claims a labelo kadagiti produktoda  Kitaek man no naawatanna met laeng dayta a termino.

Dandaniak napleng iti sungbatna: dayta kano ti mangpaneknek nga epektibo ken adun ti naagasan dagiti ilaklakona a produkto.

Saannakon a nakaibtur. Impalawagko kenkuana ti kayat a sawen dagita a balikas. Tapno mamati, linukatak ti kompiuter ket impabasak dagiti artikulo nga inurnongko. Imbagak met kenkuana a nabayagen nga agsursuratak kadagiti nadumaduma a pagiwarnak ken magasin. Nakudkodna laengen ti teltelna ken madi ti isemna a nagpakada. Sipud idin, saanen a pulos a nagsubli wenno nagteks la koma.

Ta ania ngamin aya dayta a labelo kadagiti produkto a food supplements, herbal products, vitamins, weight-loss products, beauty aids, immune system, blood circulation boosters, whiteners, sexual performance enhancers ken dadduma pay? Ania ngamin aya ti pudpudno a kaimudinganda?

Kayatna a sawen a ti kompania a nangaramid kadayta a produkto ket saanna a masinuo wenno masigurado a makaagas daytoy. Nagbatayda laeng kadagiti ‘folkloric evidences’ ken saosao a makaagas dagita. Awananda kadagiti scientific evidences a mangpaneknek a makaagas dagita. Isu ngarud a makuna a no approved therapeutic claims ta awan ti naaprobaran a scientific evidences a mangpaneknek a sigurado a makaagas ti produkto ken mangpaneknek iti ibagbagada iti advertising wenno iti labelo.  Babaen dagita a balikas, nalawag a nakasurat a maysa laeng a food supplement ti produkto, saan a medisina wenno agas.

Kadagiti dadduma, awaganda dagita a produkto iti dietary supplements wenno nutritional supplements. Iti termino dagiti agparpartuat ken dagiti aglaklako, dagitoy ti aw-awaganda iti nutraceuticals; kas katukad a termino dagiti pharmaceuticals a pangawagda kadagiti aprobado nga ag-agas wenno medisina.

Maalatayo met laeng dagiti nutrients kadagiti umno a taraon ken prutas nga ipaunegtayo ken husto nga ehersisio ken saan a panangabuso iti bagi kadagiti bisio ken taraon nga addaan iti nangato unay a calories ken fatty acids.

No saan a sigurado a makaagas dagitoy a produkto, apay ngarud a mapalubosanda a mailako iti merkado? Dayta ti dakkel la unay a kuestion.

(Adda tuloyna)

Comments are closed.