Footer

Supplemental feeding, naisayangkat iti Suyo

SUYO, Ilocos Sur – Kas pannakipaset ti gobierno probinsial iti panangiselebrar ti Suyo National High School iti Nutrition Month, maysa a grupo manipud iti kapitolio ti pinusgan ni Gov. Luis “Chavit” Singson a mangiwayat iti supplemental feeding kadagiti amin nga estudiante ditoy a pagadalan idi Hulio 30.

Iti mensahe ti gobernador nga imbasa ni Sangguniang Panlalawigan Member Teresita Cordero, kinunana a kasapulan ti pannakaipaganetget ti husto a nutrision kadagiti ubbing ta ti taraon ti kasayaatan a pangtagiben iti salun-at ket kasapulan ti panagtignay ti amin a sektor tapno maparmek ti  panagbisin ken malnutrision ket ti supplemental feeding ti maysa a wagas tapno maragpat daytoy.

Iti kaudian nga estatistika nga imparuar ti Department of Social Welfare and Development Office, 26 iti 100  a pre-school nga agtawen iti lima agpababa ti underweight. Umabot met iti uppat a milion ti agsagsagaba iti bisin gapu iti kinakurang ti ipaunegda a taraon idinto a 800,000 kadagitoy ti agsagsagaba iti nakaro unay a bisin.

Naidanon pay iti lugar ti Ilocos Sur Mobile Purification Plant a nagmalmalem a nangipaay iti libre a nadalus a danum kadagiti umili. Adda pay libre a sine a naipabuya iti asideg ti pila tapno saan a matuokan dagiti umili bayat ti panagurayda iti pannakapunno dagiti impilada a container.#

Comments are closed.