Footer

BANNER NEWS: Ospital, maitantan a mabangon, problema ti pannakamentenerna

VIGAN CITY – Agpangadua ti gobierno probinsial a mangaprobar iti pannakabangon ti maysa a primary hospital iti Quirino, Ilocos Sur gapu iti makitada a problema ti pannakamentenerna.

Kinuna ni Bokal Jerry Singson a nagpatulong dagiti agtuturay ti Quirino nga indauluan ni Mayor Clifford Patil-ao mainaig iti pannakamantener ti panggepda a bangonen

nga ospital ket ti sustainability daytoy ti makitada a problema isu a naitantan ti panangaprobarda iti kiddaw dagitoy.

Adda inted ti Department of Health a P25 milion para iti pannakabangon ti maysa a primary hospital iti Quirino.

“Ammotayo met a maysa a 4th class municipality ti Quirino,” kinuna ni Singson idinto nga innayonna a problema dagiti agtuturay no “kasano a mamentenerda ket ammoda a dida kabaelan…”

Dinakamat ti bokal ti panagbalin a white elephant ti primary hospital ti Concepcion, Del Pilar gapu ta saan a nabaelan ti gobierno probinsial a minantener.

Kinuna pay ni Singson a nai-down size ti Cervantes District Hospital manipud iti 25 bed iti 15-bed capacity agsipud ta saan a mapunpunno ti nasao nga ospital.

Inkalintegan pay ni Singson nga iti pannakai-devolve ti operasion dagiti walo a district hospitals iti probinsia, nagdakkelan a pondo ti mapan iti health sector ket marigatan ti gobierno probinsial a mangmentener kadagitoy.

Kanaig daytoy, insingasing ni Dr. Carmeliza Singson, hepe ti provincial health office, a mapagbalin laengen ti ospital a Basic Emergency Obstetric and New Born Care ket maigasto ti P15 milion para iti pannakabangon ti pasdek ken P10 milion para kadagiti pasilidad wenno personnel services.

Ngem segun ken ni Singson, agpannuray iti DOH no aprobaranna ti nasao a singasing.

Kiniddaw ni Singson ken ni Patil-ao ti panangadalda pay iti nasao a proyekto ken iti panangbuangayna iti technical working group a mapan mangisayangkat iti ocular inspection iti nasao nga ili tapno adalenda ti sustainability ti plano a mabangon nga ospital.#

Comments are closed.