Footer

EDITORIAL: Maysa a panangallilaw kadagiti tattao

Apresiarenmi  ti panangipila ni Senador Francis Escudero iti maysa a gakat a mangdusa iti asinoman a mangikabil iti naganna kadagiti paskil wenno billboards ken mamagparang a bukodna ti maaramid a proyekto wenno programa ti gobierno.

“Intalek dagiti umili ti kuartada iti gobierno babaen ti buis, kuarta ti tao, saan a dagiti opisial a publiko. Naited laeng kadagiti opisinada ti otoridad, pribilihio ken ti kalintegan a mangitudo, mangipakat, mangiyimplementar, makikoordinar wenno mangisingasing iti proyekto ti gobierno. Maibilang ngarud a kriminal ti panangibaga a personal a proyektona,” kas panangilawlawag ni Escudero.

Sagudayen ti gakat ni Escudero a mapatawan ti nagbasol iti agingga iti maysa a tawen a pannakaibalud ken panagmulta iti P100,000 agingga iti P1 milion depende iti kapateg ti proyekto ti gobierno.

No lumsot daytoy a linteg, ikkanna iti natangtangken a ngipen ti impaulog ni Department of Public Works and Highways Secretary Rogelio Singson a pammilin a mangiparit iti panangaramat iti nagan wenno ladawan ni politiko kadagiti billboards mainaig kadagiti proyekto inprastruktura iti pagilian.

Iti biangmi, makuna pay ketdin nga ingget ladaw daytoy a pammilin gapu ta naipaugalin  kadagiti politiko wenno opisial ti gobierno nga ibambando ti naganda kadagiti maaramid a proyekto kadagiti probinsia, distrito wenno ili. Nagbalinen a kadawyan ti pannakabasa ti nagan ni politiko wenno public official nga akinproyekto iti maar-aramid nga inprastruktura, pagadalan, tiendaan, uray pay dagiti waiting shed, pagbasketbolan, solar drier ken no ania ditan a proyekto a kasla ketdin nagtaud iti bulsada ti nagastos kadagita a proyekto.

Idi la ket ngaruden sakbay ti eleksion idi Mayo 2010, madalanan kadagiti kalkalsada dagiti namirit a proyekto a pinatakder ni kastoy wenno ni kasdiay a kandidato, karaman ti umis-isem  ken  kasla saan a makapettak iti bulong a ladawanna.

Nakababain ti kastoy a maar-aramid agsipud ta kuarta ti tattao ti naggapuan ti nabusbos iti pannakaipatakder wenno pannakaipasdek dagitoy a proyekto. Nagtaud iti nabusbos iti buis dagiti tattao.   Ngem anian ta ibambando ketdin ni politiko babaen ti nagdadakkelan a tarpaulin wenno paskil nga isuda ti akimproyekto kadagitoy wenno naibangon dagitoy iti babaen ti administrasionda. Agdadata a maysa daytoy a panagkampania wenno panangibayog iti personal nga interes wenno pagimbagan ti opisial wenno kandidato  ken panangallilaw kadagiti umili a nagtaud iti bulsada ti nabusbos kadagitoy ken maibilang a gapuananda wenno kas panagserbida para iti pagimbagan (kano) dagiti tattao.

Napapanawen ngarud a maikkaten wenno maisardengen daytoy a panangbalballaibo kadagiti umili.#

Comments are closed.