Footer

ITI INDAYON NI LAGIP: Nakasalda nga ayat (Tuloyna)

Iti dayta a rabii, karaballikidak iti iddak. Saannak a paturogen ti problemak no sadino ti pangalaak iti pagbayadko iti ospital iti pannakaopera ni tatang. Iti kaudian a text ni ading, kayaten ni tatang ti rummuar iti ospital ngem saan a palubosan dagiti mangimaton iti ospital no saan a mangipayuna iti bayadna iti nabusbos iti panagggianna iti ospital.

Pangalaak iti kuarta? Apay a no kastoy a karigat ti maiggaman a pirak, isu met ti isasangbay ti panagkasapulan?

Iti akimbaba a pagiddaan, nagmayat ti sanapsap ni Brenda, mabalin nga agar-arapaap. Nakariknaak iti apal iti gayyemko ta awan ti nadagsen a problemana iti biag.

Sumangkautro, sumallisallin ti naibalikas ni Brenda bayat ti panangrabiimi iti kaadda iti posibilidad nga adda rikna ni Sir Marius kaniak ket agur-uray laeng iti nasayaat a gundaway a mangipeksa iti ayatna kaniak.

Pudno kadi ti imbaga ni Brenda? Ngem diak mamati nga agduyos ni Sir Marius iti maysa a kas kaniak a di pay nakaaddak iti kolehio.

Tinungpak ti makannigid a pingpingko tapno maputed dagitoy a mapampanunotko. Kaniak a biang, ibilangnak ni Mang Marius a maysa a kabsat a pagpasiganna no adda problemana.

Ngem dimmuko manen ti sutil a panunot: ania ngata no agpayso nga ipatpategnak ni Mang Marius iti nalimed? Manen, simngay ti saludsod: no agdaton nga agpayso kaniak ni Sir Marius, ania ti aramidek?

Nakaturogak a dayta ti linaon ti panunotko.

Kabigatanna, saannak a nagkutkuti iti iddak uray idi dagdagennak ni Brenda a bumangonen tapno mammigatkami.

“Apay, dika sumrek ita?” inamad ni Brenda idi sumrek iti kuartomi a diak pay nakasukat.

“Saan,” insungbatko. “Padasek ti mapan iti SSS bareng adda mautangko ta ipatulodko idiay balay a yunada iti ospital.”

Nagkuenta ni Brenda. “Adda met ngata nasurok a dies mil a mautangmo,” nakunana. “No maikkat dagiti interes ken dadduma pay, makaiyawidka iti nakurang siguro a siete mil.”

“Kasta?” naragsakannak. “Mapanak ngarud mangala iti aplikasion nga umutang.”

Dinagdagusko ti nagrubbuat. Dimsaagak iti asideg ti opisina ti SSS. Napanak nagdamdamag no mano ti mautangko. Husto ti kuenta ni Brenda, adda maiyawidko a pito ribu. Naragsakak a naggawid ta uray  kaskasano addan  ipaw-itko a kuarta kada tatang. Bareng adda mainayonko nga ipatulod no agsueldoak.

Karabianna, impadamag ni Brenda a biniroknak ni Sir Marius. Nagsalsaludsod kano ket kapilitan nga impalgak ni Brenda ti problemak iti kuarta.

“Apay ngamin nga imbagam daydiay?” nakunak. “Imbagam latta koman a madmadi ti riknak.”

“Ay, saannak a pinalusposan agingga iti diak impudno kenkuana a napanka iti SSS umutang,” nakuna ni Brenda. “Ammom ti kinunana idi naammuanna ti problemam?”

“Ania?” sinaludsodko.

“Apay kano a dimo imbaga kenkuana ta natulongannaka koma.”

Diak ninamnama dayta nga imbaga ni Brenda. Ni Mang Marius, madadaan a mangpautang kaniak iti dakkel a kantidad?

Mangsutsutil ti kidday ni Brenda. “Agpayso ti suspetsak, adda rikna ni sir Marius kenka!”

(Adda tuloyna)

Comments are closed.