Footer

Kompania ti toothpaste, sabon, nangisayangkat iti dental mission

STA. CRUZ, Ilocos Sur – Sangagasut innem a pulo ket uppat nga estudiante iti Grade III ti benepisario iti dental mission nga insayangkat ti maysa a kompania ti toothpaste ken sabon iti maysa a pagadalan ditoy itay nabiit.

Naipaayan iti libre a dental a serbisio dagiti 164 nga estudiante kas paset ti Zero Cavity Mission Caravan Project ti Colgate-Palmolive a naisayangkat ditoy idi Agosto 4 babaen ti pannakikoordinar ti Department of Education Ilocos Sur Division.

Tallon a tawen nga isaysayangkat  ti Colgate-Palmolive daytoy a proyekto iti panangidaulo ni Dr. Vinnie Sison ken ti bunggoyna sipud pay nag-Grade I dagitoy nga ubbing. Malaksid a nasimpa, nadalusan wenno napag-ot dagiti ngipen dagiti estudiante, naikkanda pay iti libre a toothpaste ken toothbrush tapno maitultuloy ti pannakadalus dagiti ngipenda kalpasan ti dental mission.

Idi napan a tawen, binisita ti grupo ti 46 a pagadalan ken nasimpada ti ngipen ti aganay 10,000 nga ubbing iti sibubukel a pagilian.

Kinuna ni Dr. Milagros Bungolan ti DepEd Ilocos Sur a nagasat ti Sta. Cruz Central School ta daytoy ti napili a benepisario iti sibubukel a probinsia.

Malaksid ti Ilocos Sur, naisayangkat pay ditoy Rehion I ti nadakamat a proyekto iti San Nicolas Central School, San Nicolas, Ilocos Norte; Baoang Central School, Bauang, La Union; ken Mangatarem Central School, Mangatarem, Pangasinan.#

Comments are closed.