Footer

Police station, parupa ti PNP: regional director

CAOAYAN, Ilocos Sur – Kinuna ti regional director ti Region I a maysa a wagas tapno mapasayaat ti kapabilidad ti kapolisan ditoy nga ili ti pannakabangon ti baro a police stationda agsipud ta daytoy ti parupa ti Philippine National Police.

Daytoy ti imbatad ni PNP regional director Police Chief Supt. Orlando Mabutas bayat ti ground breaking ceremony iti lugar a pakabangonan ti police station idi Agosto 5.

“Dawatek ti naan-anay a pannakipagkaykaysa ken pannakikooperar  ti  sibubukel a komunidad ta saan a kabaelan ti PNP laeng nga aramiden ti amin,” kinuna ni Mabutas idinto nga impasiguradona  ti “commitmentko a mangpatalinaed iti kinatalna iti sibubukel a Rehion Uno.”

Malaksid ken ni Mabutas, indauluan da Gov. Luis “Chavit” Singson ken Mayor Germelina Singson-Goulart ti seremonia a sinaksian dagiti empleado ti munisipio ken dagiti polis ditoy.

Kinuna ni Goulart a ti pannakapaadda ti pasdek ti mang-motivate iti kapolisan tapno ad-adda pay nga ingetanda ti kampaniada kontra krimen.

Kabayatanna, indawat ni Gov. Luis “Chavit” Singson nga ingetan ti PNP ti kampaniana kontra illegal a panagkalap nangruna iti panagaramat iti bungbong ken bukatot.

“No saan a malapdan ti panagraira ti illegal a panagkalap, saan a mabayag awanton ti makalapan nga ikan. Agkurangton ti taraon dagiti sumaruno a henerasion. Isu nga agpanunottayo koma itan,” kinuna ni Singson.

Impasingked ti gobernador ti pannakitinnulong ti administrasionna iti amin a gannuat ti PNP.#

Comments are closed.