Footer

Report ti government chemist, mayur-uray: Vice Mayor Singson

VIGAN CITY – Kinuna ni Vice Mayor Ryan Luis Singson nga iyur-urayda ti report ti government chemist a nangkita iti timbang ken klase ti droga a naala dagiti otoridad iti ikut ni Congressman Ronald Singson.

“Awan pay ti report agingga ita,” kinuna ni Singson iti interbiona iti lokal a media idi Agosto 9 ditoy.

Idi madamag ti kasasaad ti kabsatna, kinuna ni Singson a “nasalun-at” met idinto nga innayonna a simmayaat ti hitsura ti kabsatna kas naidanon a report kenkuana.

Nagyaman ti bise mayor kadagiti suporta ken kararag dagiti gagayyemda nga “isu ti mangmangted iti pigsa” iti pamiliada.

Maipalagip a naaresto ni Diputado Singson iti Customs Arrival Hall ti Chek Lap Kok International Airport iti Hongkong idi Hulio 11 kalpasan a nakasukal dagiti otoridad iti 26.5 grams a cocaine ken dua a tableta a a diazepam wenno valium iti ikutna.

Iti pannakaisurat daytoy, nakadetene ti diputado iti nasao a pagilian ket naiskediul a madengngeg ti kasona inton Agosto 19.

Kabayatanna, nangipaay dagiti konsehal ditoy siudad babaen ti panangidaulo ni Konsehal Lourdes Baquiran iti panagsessionda  idi Agosto 9 iti maysa a kararag para iti madagdagus nga iruruar  ti congressman.

Kinuna ti bise mayor nga apaman a makaruar ti kabsatna, isunto ti agyaman kadagiti suporta ken kararag nga impaay dagiti kailianda.

Impalgak ti ub-ubing a Singson nga isu ti mangsursurot kadagiti nabatbati a proyekto ti diputado tapno maidanon kadagiti kalugaranda iti umuna a distrito.

Segun iti bise mayor, saan a mapan iti Hongkong iti aldaw a pannakadengngeg ti kaso ti kabsatna.#