Footer

Riders in tandem nagiwayat pammapatay iti Vigan City

VIGAN CITY – Mapapati a panaglakuan iti maiparparit a droga ti makagapu ti pannakapapatay ti maysa a residente iti Barangay VI ditoy siudad idi malem ti Agosto 10.

Pinaltogan ti dua a lalaki a nagkalubbon iti motorsiklo ni Roger Cariaga y Aquino, 45, baro, awanan panggedan ken residente iti Barangay VI ditoy bayat ti panagdaliasat ti luganna a chop-chop motorcycle, kaduana ti live-in partnerna a nainaganan Violeta Camacho y Fontejon, 31, ken ti 6 ti tawenna nga anakda iti Gen. Luna Street, Barangay 1 ditoy siudad iti agarup 2:30 ti malem ti Agosto 10.

Indeklara ti doktor a nangtaming ken ni Camacho a natayen daytoyen idi maidanon iti Metro Vigan Cooperative Hospital. Naitaray met iti Gabriela Silang General Hospital ni Camacho ken ti ubing tapno maagasan dagiti sinagrapda a dunor gapu iti pannakaikras ti naglugananda a motorsiklo kalpasan ti pammaltog.

Nagsagrap ni Cariaga iti sugat iti ulo ken tengngedna a mapapati a gapuanan ti kalibre .45 kas maibatay iti dua a kapsula ken dua a buli a narekobre dagiti inbestigador iti lugar a nakapasamakan ti krimen.

Nangiwayat dagiti polis iti hot pursuit operation ngem nakalibasen dagiti di pay nabigbig a suspek.

Madama ti panagimbestiga dagiti polis no mainaig iti mapapati a pannakainbolbar ti biktima iti illegal a panaglakuan iti droga ti motibo ti pammapatay.#

Comments are closed.