Footer

Session ti hunta probinsial, maangay kadagiti ili

VIGAN CITY – Maiyakar  ti pagsessionan ti hunta probinsial kadagiti ili maminsan iti tunggal bulan para ti ad-adda nga epektibo a panagpanday iti linteg.

Inaprobaran ti sangguniang panlalawigan ti resolusion ni Vice Governor Deogracias Victor “DV” Savellano a pannakaisayangkat ti session ti hunta probinsial iti mapili a sangguniang bayan iti maminsan iti makabulan tapno maaddaan ti probinsia ken ili iti maymaysa a direksion mainaig iti panagpanday iti linteg.

Inrekomenda ni SPM Orlino Tesoro, chairman ti committee on rules and municipal statutes, ti pannakaaprobar iti resolusion ni Savellano bayat ti sessionda idi Agosto 10 agsipud ta segun kenkuana, mangitunda daytoy iti mas epektibo a panagpanday iti linteg ken mangiliklik iti pannakaumada iti langa ti session hall.

Innayon pay ni Tesoro a maysa nga nainsiriban nga addang ti panangtulong kadagiti sangguniang bayan para iti nadardaras a panagdur-as.

Kabayatanna, naaprobaran iti daytoy met laeng nga aldaw dagiti resolusion a mangkidkiddaw iti pannakaipangruna iti pannakakongreto, pannakasimpa ken pannakamantener dagiti provincial roads iti Ilocos Sur, resolusion a mangipalubos ken panang-engganio kadagiti estudiante ti Ilocos Sur Polytechnic State College ken dadduma pay nga institusion nga ag-on the job training iti BaRang-ay demofarm iti San Juan, pannakaaprobar ti Supplemental Budget No. 2  ken No. 5 ti Quirino nga agdagup iti P1,283,388 ken P118,100; pannakaaprobar ti Supplemental Budget No. 2 ti Magsingal nga agpateg iti P535,532.19; Supplemental  Budget No. 2 ti Cabugao nga agpateg iti P1,071,903.13; Supplemental Budget No. 3 ti Burgos nga agdagup iti P387,346.21; Supplemental Budget No. 1 ti Sta. Maria nga aggatad iti P4,118,685.21; Municipal Ordinance No. 09-2010 ti Lidlidda a mangiyalokar iti P110,000 manipud iti R.A. 7171 municipal share; Municipal Resolution No. 25-2010 ken 26-2010 ti San Vicente a mangpasingked iti pannakadutok ti municipal planning and development coordinator ken municipal administrator ti nadakamat nga ili.#

Comments are closed.